KOLUMISON BOROS SUNDAIT ID KAMPUNG LOKOS
BAB 1
1.0 PONOGULU
1.1 KOPOINTUTUNAN
Toinsanan tinimungan momogun hiti id pomogunan kaampai no tinaru
Kadazandusun nopo nga kiwaa karya sastera id bontuk lisan toi ko' ponuatan.
Tumanud di Bartlet id suang ponoriukan di Rosliah Kiting et al. (2016), sastera
lisan toi ko' folklore lisan nopo nga iso bontuk sastera di maan parangahai.
Sastera lisan nogi diti nga haro koulalaho pointantu miagal do kiwoyo
tradisional, mogisuusuai o bontuk toi ko' versi om au noilaan isai kopio o
minomonsoi. Poomitanan nopo nga sundait, sudawil, talaala, tangon, rinait,
tudodoi, tuntura om ogumu po.
Ponoriukan nopo diti nga poingimpou do sundait sabaagi iso boogian
di poingamung id suang gana kesusasteraan lisan momogun Kadazandusun.
Tumanud di Lokman id suang ponoriukan di Low & Lee (2012), sundait id
Boros Kadazandusun (BKD) nopo nga piomungan do duo hogot ii no
“sunundait” (montok momisunud toi ko' sinduai) om “karait” (montok
monimbar). Sundung do ingkaa, mogisuusuai o istilah di gunoon tumanud do
subetnik Kadazandusun. Poomitanan, mamarait o etnik Dusun Tambunan do
sundait sabaagi sesandaiten toi ko' sunandait (Williams 1963) om mogigion id
Kadamaian, Kota Belud nopo nga mamarait do poguhatan sabaagi sundait om
sisimbar dau nopo nga araiton (Evans id suang ponoriukan di Low & Lee,
2012). Tumanud di Pugh-Kitingan (2016), polombuson o sundait ontok timpu
mongomot id ranahon sabaagi iso bontuk kohiakan. Soira mongia’ do lilihis id
sikul, minog do oilaan o aspek koulalaho om fungsi do hiis dii. Mantad dii,
ponoriukan nopo diti nga montok mongilo do koulalaho maya struktrur sundait
di insaru gunoon do komolohingan maso mongomot id Kampung Lokos,
mongilo fungsi sosial do sundait i gunoon do komolohingan maso mongomot