parai id Kampung Lokos om nogi mongilo kounalan do kopomogunoon sundait
sabaagi kolumison boros id koposion tinaru Kadazandusun.
1.2 KAPATAYADAN KOBOLINGKAHANGAN
Koburuon om rahung mantad mogisuusuai tadon mogowit do
kobolingkahangan om tantaman doid gana pondidikan Boros Kadazandusun
kohompit no gana kesusasteraan, sosio-budaya om nogi koposion tikid tadau
do tinaru Kadazandusun. Mantad dii, nuru do tolibambanon o kobolingkangan
dii om iso nopo laang di milo powonsoyon nga maya do ponoriukan.
Maya kowolihon timpu om koburuon teknologi, okuri nodi momogun
Kadazandusun di kikoilaan toi ko' kikabaalan kokomoi kesusasteraan lisan
loolobi po i sukod wagu. Sinokodung iti di Taisin id suang ponoriukan Rowdella
Raymond Raimi (2017) do kogumuan sukod wagu au no kirahi kumaa tradisi
lisan tu lobi agayat ginawo diolo kumaa do bontuk kohiakan kawawagu. Id
pionitan dilo, okuri po o ponoriukan di nokoindalan kokomoi diti sundait.
Montok komolohingan id Kampung Lokos, au songkuro okito o goos
popotungkus do sundait diti kumaa sukod wagu tu au nodi insaru pohoroon o
ababayan mogisusundait maso mongomot. Tumanud di Appell id suang
ponoriukan Norjietta Julita Taisin (2019), haro no tradisi lisan di nokoburu id
taang takawas om nogi kikogingohon di poinlobi id suang koposion do
momogun sandad id Sabah. Ogumu puru mangakun do tradisi lisan dii nga au
yolo opusou kokomoi kapansalan tradisi lisan dii om au nogi pinoindalan o
dokumentasi. Ahal diti popokito do au pinusou o sundait diti sabaagi kakamot
pinsingilaan om nosiliu iso korutumon kumaa tinaru Kadazandusun loolobi po
i sukod wagu tu oponsol kopio koilaan kokomoi sastera lisan mooi ogumu
koinganan om toilaan aanu mantad tungkus tinaru sondii loolobi id aspek
kolumison boros.
Mantad di, pinoindalan o ponoriukan diti moi kaanu mongintutun do
sundait sabaagi iso boogian mantad tradisi lisan Boros Kadazandusun. Suai
ko ii, kaanu ponoriukan diti do manahak tituduk kumaa tongomongingia' om
kotinanan di kohompit montok poposiliu do sundait sabaagi iso kakamot