Kampung Lokos do gunoon ontok timpu mongomot om nogi kounalan do
sundait montok aspek kolumison Boros Kadazandusun miagal di poinsuang id
kurikulum sikul. Poinrontob nogi ponoriukan diti tumanud kinoyonon, subetnik,
timpu om aspek ponoriukan di pinili. Komoyon nopo nga asil ponoriukan au
popokito koinsanan koilaan kokomoi sundait id suang koposion tinaru
Kadazandusun.
1.5 KAPANSALAN PONORIUKAN
Oponsol o ponoriukan diti montok mongintutun do tradisi lisan sundait id
Kampung Lokos om momonsoi nogi dokumentasi tu sundait nopo diti nga
pinolombus om pinotungkus toomod doid bontuk lisan om apangkal do ihumon
doid bontuk ponuatan. Tumanud di Low & Lee (2012), limo nogi karya
akademik kokomoi sundait Kadazandusun di nakalabus om ii nopo nga
sinoriuk di Evans (1951; 1954; 1955), Williams (1963) om Lokman (2004).
Nung au soriukon om poopion, olihuan o kopomogunoon sundait diti sabaagi
soboogian do sastera lisan tinaru Kadazandusun. Manahak nogi o ponoriukan
diti do kotolinahasan kumaa tulun ginumuan okon nopo ko id Kampung Lokos
nga toinsanan tulun Kadazandusun kokomoi kouyuuyuo’ monundait,
poomitanan om roromu sundait id konteks aplikasi komolohingan maso do
mongomot id Kampung Lokos om kounalan sundait sabaagi kolumison Boros
Kadazandusun.
Sumusuhut, oponsol o ponoriukan diti sabaagi sukuon montok isai-isai
nopo i orohian do minsingilo kokomoi sundait id Boros Kadazandusun loolobi
kopio i tongomongingia’ om sukod wagu mooi kotungkus o sundait dii sabaagi
kopokitanan koubasanan om boros tinaru Kadazandusun. Ponoriukan
kokomoi sundait nogi nga iso ralan do mamagatang om popotungkus do
sastera lisan i winonsoi do komolohingan di laid po. Id gana pondidikan, kaanu
o ponoriukan diti momoruhang kawagu ginumu ponuatan om ponoriukan di
nowonsoi om kakamot pambalajalan montok aspek kesusasteraan lisan,
koubasanan om kolumison Boros Kadazandusun.