KOLUMISON BOROS SUNDAIT ID KAMPUNG LOKOS / JILORISA JOHN

1.6 POKOMOYON OPERASIONAL

1. Sastera lisan nopo nga bontuk karya sastera i nokoimbulai id suang
   koposion momogun praponuatan, winonsoi om polombuson maya lisan
   (Kamus Kesusasteraan id suang ponoriukan di Intan Sazima Sarip, 2021).
   Sastera lisan nopo diti nga au noilaan isai minomonsoi, tadauwulan om timpu
   kinapamansayan om pinaasil tumanud kotumbayaan om ralan koposion
   toisoiso tinimungan momogun. Id ponoriukan diti, poinhangkum nogi o sundait
   sabaagi iso o kawo sastera lisan.


2. Sundait nopo nga iso poguhatan prosaic doid boros pointantu montok
   mangangat tulun suai monindu identiti objek di maan uhoto. Tumanud di
   Brundvand; Danandjaja 192:21 id suang ponoriukan di Asmiaty Amat &
   Lokman Abdul Samad (2013), sundait nopo nga soboogian mantad tradisi
   lisan. Id suang ponoriukan diti, sundait nopo nga sumuku do soboogian
   mantad sastera toi ko’ tradisi lisan di polombuson do komolohingan maso
   mongomot id Kampung Lokos.


3. Roromu sundait nopo nga koulalaho toi ko’ suang doid suang sundait di
   maan iloo miagal ko’ struktur, kawayaon do monundait, kopomogunoon boros
   om toud momonsoi sundait.


4. Koubasanan nopo nga iso sistom gagasan, koimaan om asil karya tulun
   montok momogonop koposion toisoiso tinimungan momogun
   (Koentjaraningrat id suang ponoriukan di Ellya Rosana, 2017). Id ponoriukan
   diti, koubasanan sandad nopo nga popohompit do ralan koposion,
   koubasanan tinungkusan om nogi sistom kotumbayaan sandad id koposion
   komolohingan id Kampung Lokos.


5. Kolumison boros nopo nga komponen di kaanu papasarabak kaanangan
   minsingilo Boros Kadazandusun om popoingkawas do imaginasi maya
   karangahan Boros Kadazandusun mantad mogisuusuai tadon miagal do hiis
   koubasanan, sinding om susuyan.