BAB 2
2.0: PONGINTANGAN LITERATUR
2.1 KOPOINTUTUNAN KONTEKS PONORIUKAN
Ponoriukan nopo diti nga iso ponoriukan etnografi kokomoi sundait id
Kampung Lokos montok mongintutun om popotolinahas do koulalaho om
roromu maya struktur sundait di polombuson do komolohingan id Kampung
Lokos maso mongomot. Mongilo nogi o ponoriukan diti do fungsi sosial sundait
dii. Suai ko ii, ponoriukan kokomoi sastera lisan tinaru Kadazandusun diti
kaanu momoruhang do ponoriukan id gana sastera lisan Boros Kadazandusun
loolobi id aspek kolumison boros. Mantad dii, kiwaa piipiro teori om ponoriukan
nokopogulu i nosiliu sabaagi impohon om ponguhup montok popoindalan do
ponoriukan.
2.2 TEORI PONORIUKAN
- Teori Koubasanan
Teori koubasanan nopo nga iso ahal kompleks di pointongkop om kiwaa do
toilaan, kabaalan, kotumbayaan, kooturan, adat om suusuai po. Gunoon o
teori koubasanan doid ponoriukan diti tu koubasanan nopo nga haro pionitan
miampai momoomogun. Tumanud di Syed Ismail id suang ponoriukan di Intan
Sazima Sarip (2021), koubasanan nopo nga ponginruaian do aspek koposion
do tulun doid kesusasteraan, sistom politik, inus monguridong, inus lukisan,
muzik, falsafah om suusuai po. Okon nopo ko ii, koubasanan nogi diti nga
ralan kopoposion toisoiso momoomogun i popohompit ababayan koposion
diolo monikid tadau. Mantad dii, sundait nopo nga kiwaa pionitan kumaa
koubasanan tinaru Kadazandusun id suang aspek tradisi lisan om kolumison
boros tu pinotungkus ii mantad molohing di nokopogulu.
- Teori Antropologi Sastera
Teori antropologi sastera nopo nga piomungan do antropologi om koubasanan
miampai sokodung do sastera. Tumanud di Nyoman id Asmiaty Amat &
Norsuhaila Sulaiman (2019), antropologi sastera nopo nga ponginsamakan do