disiplin psikologi sastera om sosiologi sastera id nombo psikologi sastera nopo
nga poposotol do aspek kosunduan momogun om sosiologi nopo nga
momohuyad do aspek momogun om latar sosial. Mantad dii, antropologi
sastera nopo nga kokomoi tulun doid toisoiso koubasanan. Mantad do aspek
antropologi, nunu-nunu nopo kointalangan kokomoi koimaan tongoulun di laid
po asil winonsoi do momogun popokito koulalaho koubasanan i nosiliu toud
pibarasan doid sastera di imaginatif om kreatif. Kosudong do gunoon o teori
diti tu kopoindalanan ponoriukan nopo nga montok mongilo fungsi sosial do
ababayan monundait di poindalanon do komolohingan maso mongomot id
Kampung Lokos mooi lobi orotian o koubasanan monundait id perspektif
komolohingan id Kampung Lokos.
- Teori Fenomologi
Teori fenomologi nopo nga iso teori di minggoos mamarati koubasanan id
perspektif do sanganu toi ko’ i popoburu koubasanan dii. Tumanud di Moleong
id suang Suwardi Endraswara (2006), ponginsamakan fenomologi nopo nga
mamarati pionitan do toisoiso kaantakan miampai tongoulun di oubas do
kawaya kaantakan dii. Mantad dii, kaanu ponoriukan diti momorindako roromu
toi ko’ koulalaho sundait poingimpou rahung om pola koposion id konteks
komolohingan id Kampung Lokos tumanud sistem kotumbayaan, organisasi
sosial, koinusan, toilaan om boros sabaagi ula koubasanan.
2.3 PONORIUKAN DI NOKOPOGULU
- Investigating the relationship between Kadazandusun beliefs about
paddy spirits, riddling in harvest-time and paddy-related sundait (2012).
Ponoriukan nopo diti nga pinoindalan di Low Kok On & Lee Yok Fee montok
mongilo do piungkonitan do sundait Kadazandusun ontok timpu mongomot
miampai kotumbayaan kumaa sunduan do parai i lohowon do Bambarayon.
Fokus nopo ponoriukan diti nga momorindako tinimungan sundait
Kadazandusun i kiwaa roromu parai poingimpou konteks om sosial tulun
Kadazandusun. Suai ko ii, popokito nogi o ponoriukan diti pionitan do
kotumbayaan kumaa Bambarayon miampai sabab do momuumutanom
Kadazandusun popoindalan ababayan monundait ontok timpu mongomot.