informan nga popokito woyo pomusarahan toi ko’ kognitif di akawas tu soira
monimbar toisoiso sundait, nuru o sosongulun do monindu sisimbar sundait
dii. Maya imaginasi om pomorindakan sundait, popohompit ii do proses
popionit miampai posorili om koposion om nogi momuhondom kawagu
kaantakan di nawayaan montok mogihum sisimbar.
iii. Ponginiba tadau
Kifungsi o sundait sabaagi iso laang pogoling do huyan om sabaagi motivasi
doid konteks ekosistem momuumutanom. Poindalanon do komolohingan o
ababayan mogisusundait maso mongomot id Kampung Lokos montok
ponginiba tadau tu kaanu ii mongidu topurimanan do ohuyan om apaasan
soira kumalaja. Tumanud do asil ponoriukan di Low (2013) kokomoi sundait
Rungus, kaanu o tulun di kohompit doid pisundoitan do mogoling topurimanan
di ohuyan om au oliwawos soira mogihum yolo sisimbar montok toisoiso o
sundait. Sokiro nopo agayo omoton, au songkuro kopuriman apaasan do
tumoodo dii soira mogisusundait yolo tu au nopo koilo sisimbar nga mokirarait
nopo gisom do au opurimanan mamanau timpu.
iv. Pomolingo toi ko’ pomolihis ginawo
Ababayan mogisusundait nogi diti nga oponsol montok do pomolingo toi ko’
pomolihis ginawo tu haro genre sundait di ongkotompuirak tomod. Sundung
ohuyan soira mongomot, au kopio opurimanan ii soira poindalanon o
ababayan mogisusundait tu haro kohiakan maso mongomot. Sinokodung iti do
Sabah Museum 1993; Lokman 2004 id suang ponoriukan di Low & Lee (2012)
do ababayan mogisusundait nopo nga kaanu popoingkawas sunduan di
mongongomot sundung do alasu om ohuyan tu atangkangau yolo do
monimbar sundait.
v. Popogirot piromutan tiso om tiso tulun di kaampayat pisundoitan
Nosiliu o sundait sabaagi do kakamot interaksi do mogigion id Kampung Lokos
soira mogitatabang do mongomot tu misuai o sundait mantad ko mogiboboros
toomod. Mantad dii, oponsol o ababayan mogisusundait soira mogitatabang
moi kaanu popoimbulai woyo koposion tulun di oulud, osombulu om
misompuru id toisoiso kinoyonon.