BAB 5
5 .0 POMOLINGKUMAN, SOGU OM BAGAS
5.1 KOPOINTUTUNAN
Popointalang o bab diti do pomolingkuman pointongkop montok ponoriukan di
nokoindalan kokomoi do kolumison boros sundait id Kampung Lokos. Haro
apat sub-uhu id suang bab diti i popohompit do pomolingkuman ponoriukan,
sogu montok ponoriukan di kipionitan ontok timpu dumontol, bagas ponoriukan
kumaa tinan sondii, kinoyonon ponoriukan, pondidikan, tinaru Kadazandusun
om tulun ginumuan om nogi pongintigasan montok bab diti.
5.2 POMOLINGKUMAN
Maya ponoriukan diti, haro limo koulalaho do sundait di gunoon do
komolohingan maso mongomot id Kampung Lokos om ii nopo nga haro
sundait di oniba om aralom, momoguno boros om kororoito di kagayat om
olinuud, ogumu woyo kopolombusan do sundait, owonsoi mantad karangahan
om posorili om nogi kiwaa kooturan id suang ababayan mogisusundait.
Sumusuhut, kifungsi nogi o sundait sabaagi koubasanan toomod ontok timpu
do mongomot, mogiala-ala isai mamarait om isai ogumu susundoiton,
ponginiba tadau, pomolingo ginawo om popogirot piromutan tiso om tiso tulun
di kaampayat pisundoitan. Kopitindu do kabaalan kolumison boros id suang
kurikulum BKD sikul tosiriba, oponsol o sundait montok manahak kosiwatan
kumaa tangaanak do mongintutun, minsingumbal om monginonong do
tungkus koubasanan tinaru Kadazan om Dusun. Suai ko ii, kaanu o sundait do
papasarabak kaanangan do tangaanak doid pinsingilaan do Boros
Kadazandusun, popoingkawas woyo pomusarahan om papasarabak do woyo
toluud. Sabaagi pomolingkuman, sundait di gunoon do komolohingan maso
mongomot id Kampung Lokos nopo nga iso kawo tradisi lisan di minog do
gompion om potungkuson kumaa sukod wagu moi au atalup gama
koundolihon timpu om koburuon teknologi.