viABSTRAKTinaru Kadazandusun nopo nga osima do tinimungan sastera lisan di akawas kopio gatang
miagal ko sundait. Maya kowolihon timpu om koburuon teknologi, okuri nodi momogun
Kadazandusun di kikoilaan do sastera lisan loolobi po sukod wagu. Ponoriukan diti nopo nga
kokomoi do kolumison boros sundait id Kampung Lokos. Tudu ponoriukan nopo nga mongilo
do koulalaho sundait maya struktrur di insaru gunoon do komolohingan maso mongomot,
mongilo fungsi sosial om nogi kounalan do kopomogunoon sundait sabaagi kolumison boros
id koposion tinaru Kadazandusun. Ponoriukan diti momoguno do reka bentuk etnografi maya
kaida kualitatif miampai metodologi ponorubungan, pongintangan om soriuk kepustakaan. Asil
ponoriukan kopokito do koulalaho sundait id Kampung Lokos miagal do sundait di oniba om
aralom, momoguno boros om kororoito di kagayat om olinuud, ogumu woyo kopolombuson
do susundoiton, owonsoi mantad karangahan om posorili om nogi kiwaa kooturan id suang
ababayan mogisusundait. Fungsi sosial do sundait id Kampung Lokos nopo nga sabaagi
koubasanan toomod ontok timpu do mongomot, mogiala-ala mamarait om isai ogumu
susundoiton, ponginiba tadau, pomolingo ginawo om popogirot piromutan tiso om tiso tulun di
kaampayat pisundoitan. Kounalan do kopomogunoon sundait sabaagi kolumison boros id
koposion tinaru Kadazandusun nopo nga mionit do kabaalan kolumison boros i poinsuang id
kurikulum Boros Kadazandusun sikul tosiriba. Oponsol o ponoriukan diti montok mongintutun
do tradisi lisan sundait id Kampung Lokos om popoinggumu do sukuon tulun ginumuan i
orohian minsingilo do lobi otolinahas kokomoi do sundait.
Boros toponsol: sastera lisan, sundait, kolumison boros, koulalaho sundait, fungsi sosial