3.3.1 KAIDA PONORUBUNGAN
Tumanud nopo do di Robson (2011), ponorubungan nopo nga iso laang di
apangkal do gunoon damot monimung data om milo piomungon miampai
laang suai mooi do kapaganu data di ihumon tu. Ahal dilo tu, tisuli nopo di
naanu mantad ponorubungan nga nookunan om kiula reflektif tu kaanu do
monginruai kaantakan totopot id kinoyonon ponoriukan (Ab Samad Kechot,
2015; Chua, 2006; Denzin, 2001). Montok dii, kakamot nopo do ponoriukan di
oguno nga sapara kistruktur tu kiula’ fleksibel dadi oliwang no i mamaampayat
ponoriukan do monguyad nunu i tosorou dau kumaa di mononoriuk (Normala
et al., 2005). Dadi, pinotounda o monoonoriuk do poguhatan ponorubungan
sapara kistruktur di milo okito id pinotonggoi A mooi do lobi ouhan i informan
monimbar poguhatan om au nogi katangkid o poguhatan di monoonoriuk.
Tumohuri, ponorubungan nopo diti nga milo poopion maya video, audio om
sinuatan nuut gana mooi do au atagak o data di naanu.
3.3.2 KAIDA POGINTANGAN
Tumanud di Cheong et, al, (2018), pogintangan nopo diti nga iso karalano do
mogintong isoiso ahal maya okritis damot monimung do data. Kaida nopo do
pogintangan di ginuno id ponoriukan diti nga pogintangan maya kaampayatan
(Participant-Observation). Ahal diti tu tuminanud kopio i mononoriuk di
informan do mongoi pataan di ginama id gouton om bawang. Montok dilo,
instrumen nopo di noguno di mononoriuk nga nuut tikid tadau, rakaman audio
om rakaman video i mogintong kasandadon om karalano papataan do ginama
koubasanan. Ahal diti tu ka di Moleong (1989), pounayan nopo do oguno o
kaida diti nga popomilo do mononoriuk mogintong, mongumbal, momurimon
om nogi mamarati do kaantakan sosial di soriukon.