3.3.3 KAIDA PONIMUNGAN DOKUMEN
Instrumen nopo di noguno do monoonoriuk montok kaida diti nga dokumen di
pinoopi do informan id bontuk nuut tikid tadau. Id ahal diti, kiwaa songulun
informan di nokopoopi do nuut kokomoi ginama koubasanan id Kampung
Turuntungon Ranau Sabah. Dadi maya kasagaan di informan do monorisid
dokumen, milo o mononoriuk do monimung data maya momonsoi do nuut
gana om kointalangan gambar di kiwaa o pionitan miampai do tudu om tuhot
ponoriukan. Maya karalano monimung data miagal diti, kaanu o mononoriuk
do mogihum kakamot di milo monokodung do data di naanu mantad
ponorubungan om pogintangan mooi do koinsawat o komilotumbayaan data
ponoriukan.
3.3.4 KOOKUNAN OM KOMILOTUMBAYAAN INSTRUMEN
PONORIUKAN
Tumanud di Bailey (2007) id ponoriukan di Othman Lebar (2006), katapatan
nopo nga sumuku do ponipangan katapatan id ponoriukan tu milo manahak
do ponginruaian di koontok kokomoi do ahal di maan soriuko’. Id konteks diti,
katapatan nopo do instrumen di gunoon nga oponsol kopio tu gunoon montok
monuku do komilogunoon di data om toilaan dii naanu pogulu i do patayadon
id asil ponoriukan. Milo o katapatan diti do intangan maya do kawo toud
sukuon di gunoon id ponoriukan di poindalanon. Sumusuhut, montok nopo do
komilotumbayaan nga sumuku tinindo di ponoriukan do milo suguton montok
manganu asil di miagal (Meriam, 2001). Ahal dilo tu, komilotumbayaan nopo
id poginsamakan kualitatif nga sumuku do songkuro no o kosugutan do isoiso
kowoowoyoon om kaantakan id ponoriukan (Hj Iksan et, al, 2016). Montok dii,
pinatayad di Wierasma (2000) do adadi o ponugutan maya do karalano
ponimungan data di potilombus om minguli miampai momoguno piipiro laang.
Montok dilo, okito o komilotumbayaan id isoiso ponoriukan mantad do
koimbulayan konkrit miagal ko’ nuut, video om nogi audio di naanu mantad
ponorubungan.