4.3 KARALANO PAPATAAN GINAMA KOUBASANAN TINARU DUSUN
ID KAMPUNG TURUNTUNGON RANAU.
Maya do asil ponorubungan miampai informan C, D om E kiwaa piipiro laang
di milo tonudon damot mongoi papataan do ginama koubasanan hapas do
owonsoi. Oponsol kopio do oilaan o karalano do papataan di otopot mooi do
soira nopo mongoi pataan di ginama nga kiwaa o dupot di kosulung mooi do
haro nodii o taanu-anu montok korinapaan sangaangadau. Ingkaa nogi
montok do dupot di mongoi pomorumbak do tootonomon tu nung ko’ kosudong
i karalano papataan nga milo monolibamban kobolingkaan dilo. Montok dilo,
id boogian diti, pointalangon o karalano do papataan tikid ginama koubasanan.
4.3.1 KARALANO PAPATAAN RODSOT
Tumanud do informan C, D, E om pogintangan damot minaya di informan
papataan ginama, pogulu po do pataanon i ginama, mongoi po pangayup om
iwang-iwangan tu au nopo nga haro o wayaan suai di dupot. Andadon gisom
sominggu mooi do apatai no i tayup om kounali no di gouton posorili. Karalano
nopo do papataan ginama diti nga momonsoi po do luang id tana ongo
sandangau id kowoyoon do dupot om posuangon nogi i tompuut id luang om
parantayon no dii tana’. Hapas dii, popotounda do kayu tapapag sabaagi
tokudon montok paagatan di lawa om tolokison. Manganu kawagu do tarapang
i onuon o kayu di nokotuo dii mipango montok posowiton di tolokison id tanga
di pango om pokowiton doid tompuut. Nung aiso o pango’ nga nokoboros i
informan D do milo momonsoi mantad wulu di pinutul tolu insi om luangan
paganaru id sawat om siriba montok posowitan do lokison id luang sawat om
posisipon i tompuut tu oponsol kopio ilo tarapang montok posowitan di
tolokison.
Hapas dii, untunan do saap i tompuut mooi do au no kopio orosian
i tongodupot tu kasagalai do sakot-sakot gouton. Tumilombus dii potimpakon
nogi i lawa id tompuut tu soira nopo awayaan do dupot nga atabas i tolokison
di poinguwil id tarapang om tompuut, dadi awakas om kosulung no i takod di