unë e vrava verën -LIBËR me kopertinë
unë e vrava verën
- Ua, sa shtëpi të bukur që paske!
Nënqesha. Shtëpia ime është tepër e thjeshtë dhe modeste. Ajo sigurisht
kishte parë shtëpi të mrekullueshme, por dinte të të bënte të ndiheshe
bukur me fjalët e saj të ëmbla.
Dola në ballkon. Karriget ishin bosh rreth tryezës. U ula në karrigen
përballë saj. Më dukej se ndodhej akoma aty. E krehura karakteristike e
flokëve rrethonte hijshëm fytyrën e saj të bardhë. Ajo ndriste nga bukuria e
syve të saj të kaltër që kurorëzoheshin nga harku fantastik i vetullave.
Ngjyra e trëndafiltë e buzëve plotësonte bukurinë shekullore heleniane. Por
e qeshura, e qeshura ishte ajo që me magjinë e saj rrëzëllente dritë
magjike.
Mbylla sytë. Fillova të shihja me radhë çastet që kalova me të. Këtu
tek kjo tavolinë, duke pirë kafen e mëngjesit, flisnim për magjinë e poezisë
në shpirtin e njeriut. Ashtu me sy të mbyllur fillova të ridëgjoj intrerpretimet
e vargjeve fantastikë të Ali Podrimes prej saj. Pastaj vazhdonte me vargjet
rrënqethëse të Vojsava Nelos, duke mbajtur aq dhimbshëm në grushtin e
saj trashëgiminë therëse të të atit. ''Pasuria që më la im atë''
U drithërova. Hapa sytë. Pashë gonxhet rozë të luleve në saksinë
përkrah meje që tundeshin të shkujdesura nga era. Edhe ato mbanin
brenda tyre fjalët e saj të ëmbla.
- Unë bisedoj me lulet, - i thoshte Elenit, mbesës sime shtatëvjeçare,
që nuk i ndahej gjithë kohës.
- Edhe Kristina flet me lulet, jam e sigurt, - i drejtohej pastaj vajzës
sime që druhej të fliste shumë, si Eleni, që të mos e lodhte.
Por ajo fytyrë fisnike dinte të futej në botën e secilit. I shkelte syrin Kristinës
dhe vazhdonte të fliste me Elenin.