Uppon the morowe, when it was daye,
The standards schone fulle bryght;
To the Newe Castelle the take the waye,
And thether they cam fulle ryght.
Sir Henry Percy laye at the Newe Castelle,
I telle yow withowtten drede;
He had byn a march-man[16] all hys dayes,
And kepte Barwyke upon Twede.
To the Newe Castell when they cam,
The Skottes they cryde on hyght,
"Syr Harye Percy, and thow byste within,
Com to the fylde, and fyght:
"For we have brente Northomberlonde,
Thy eritage good and ryght;
And syne[17] my logeyng I have take,
With my brande dubbyd many a knyght."
Sir Harry Percy cam to the walles,
The Skottyssh oste for to se;
"And thow hast brent Northomberlond,
Full sore it rewyth me.
Yf thou hast haryed all Bambarowe shyre,
Thow hast done me grete envye;
For the trespasse thow hast me done,
The tone of us schall dye."
"Where schall I byde the?" sayd the Dowglas,
Or where wylte thow come to me?
"At Otterborne in the hygh way,[18]
Ther maist thow well logeed be.
"The roo[19] full rekeles ther sche rinnes,
To make the game and glee:
The fawkon and the fesaunt both,
Amonge on the holtes on hee.
"Ther maist thow have thy welth at wyll,
Well looged ther maist be.
Yt schall not be long, or I com the tyll,"
Sayd Syr Harry Percye.
"Ther schall I byde the," sayd the Dowglas,
"By the fayth of my bodye."
"Thether schall I com," sayd Syr Harry Percy;
My trowth I plyght to the."
A pype of wyne he gave them over the walles,
For soth, as I yow saye:
Ther he mayd the Douglas drynke,
And all hys oste that daye.