(Cont.d)Mi chiamastiru albiru di paci,
cci cuncijastiru frunti a l’addevi
cu l’ogghiu santu di la sapijenza,
linfa di la me linfa, e ad ogni stizza
ca pirculava supra testa viva
d’angilu, mi sinteva sciaminari
frummiculi d’amuri nta lu civu
di la radica longa,
l’erba chiara
svampava svolu sirenu di quagghi
di la me frunna azzola.
A disidderiu
di celu si turcevanu li vrazza.
Accostu a lu me truncu sbarruatu
si nni vinni a prijari Gèsu Cristu
dda notti di sintenza.
Misu ‘n trattu
prijava amaramenti, e la so frunti,
ahiahi, dda notti, ci sudava sangu
trùbbulu; nta li celi s’astutavanu
li stiddi ad una ad una...
A li me rami