Ponoriukan Nokopogulu
Adat Resam dan Pantang Larang Suku Kadazan di Penampang, Sabah, ponoriukan
di Rita Lasimbang (2013) id suang Dewan Bahasa dan Pustaka Kuala Lumpur
(2013). Ponoriukan diti popokito kokomoi do kaadat-adato’ om pogoduhan tinaru
Kadazan id Penampang om kohompit no ngawi o adat pisasawaan. Montok adat
pisasawaan nopo di narait di Rita Lasimbang do id ponoriukan dau diti nga’ kohompit
ngawi no o taang-taang manansawo do tinaru Kadazan Penampang miagal do
monohuku’ (merisik), momuhaboi (pertunangan) om tadau kataadan toi ko matod
(perkahwinan), sogit kotohiban, sogit pitas, sogit sumbang, sogit kosugku om sogit
babo’.
Sumusuhut, ponoriukan di Siti Azizah Binti Idris (2017) kokomoi Adat Baisan
dalam Perkahwinan Masyarakat Dusun Tatana di Kampung Menumpang Kuala
Penyu. Maya ponoriukan diti, noilaan o proses adat pisasawaan tinaru Dusun
Tatana’ kokomoi do adat boisan i narahung do ugama Buddha toi ko Kristian.
Kopoindalanan toi ko proses adat boisan nopo id pisasawaan tinaru Dusun Tatana’
nga’ miagal do mongoi uwot, mitantu, tadau kumawin, adat baisan om nogi waya
wagu. Nointutunan nogi piipiro sogit i kopohompit do pisasawaan di kiwaa
pinsamakan do piompinayan. Bontuk sogit nopo di poontokon kumaa pisasawaan di
osomok o piompinayan nga’ kohompit no o sogit pitas om piringan.
Tumilombus, Adat Resam dan Pantang Larang Suku Bajau Sama di Kota
Belud dan Pantai Barat Sabah, ponoriukan di Radik Taim (2013) id suang Dewan
Bahasa dan Pustaka Kuala Lumpur (2013). Maya ponoriukan diti, noilaan do kiwaa
kaadat-adato’ soira manansawo miagal do adat pogulu manansawo miagal do
merisik toi ko’ modsuruhan, peserong mendo (monunui / momuhaboi) om ngatur
penogot (sogit / tahakan). Kiwaa nogi pogoduhan do tinaru Bajau id saalom
pisasawaan miagal do amu pasaga’on miongoi nung osomok tomod piobpinayan
miagal do miadi’-adi’ toi ko’ mipinsan di moginsomok po tomod. Otumbayaan yolo do
piangayan nopo dii nga’ roitan do ‘panas’ toi ko’ alasu (sumbang) om milo onongon
do sogit di awagat.
Soerjono Soekanto (1992), Intisari Hukum Keluarga, Bandung, Citra Aditya
Bakti, adat pisasawaan kokomoi sistem Eleutherogami. Pogoduhan nopo id suang
sistem diti nga’ kokomoi pogoduhan i mionit do pikagasan paganakan i kasait do
sakag miagal do pisasawaan di osomok tomod pionitan do raha’. Nosiliu o
pogoduhan toi ko’ adat pisasawaan id sistem Eleutherogami diti id kogumuan tinaru
Indonesia.