Kopointutunan
Boros Kadazandusun nopo nga’ sabaagi boros di gunoon do tinaru Kadazan Dusun
id pogun do Sabah. Boros Kadazandusun diti haro ogumu ‘dialect’ tumanud do
isoiso watas id pogun do Sabah. Boros Kadazandusun nogi nga’ iso’ Boros Tina di
gunoon do tulun gulu-gulu tinaru Kadazan Dusun. Babaino diti ogumu sukod wagu di
au koilo mimboros Boros kadazandusun loolobi po tangaanak di nosusu om nosukod
id pogun do suai. Haro i koilo do mimboros Boros Kadazandusun nga’ okon ko
sabaagi boros tina nga’ boros kumoduo i noilaan mantad pambalajalan id sikul. Okuri
tomod sukod wagu di koilo om kaanu mimboros Boros Kadazandusun miampai
alantas.
Kointalangan Kobolingkangan
Ogumu tulun amu momonsol do kounalan boros tinaru sondii gisom i do au
nokopuriman iso’ po hogot boros tinaru sondii nga amu kotutun. Kogumuan sukod
wagu timpu baino nogi nga’ au kotutun do boros tinaru dau sondii. Okito ahal diti id
pogun do Sabah hinonggo kumurikuri nodii tulun di koilo mimboros do boros tina dau
sondii. Babaino diti, koundolihon boros id suang piromutan tulun tinaru Kadazan
Dusun diti nosiliu do iso’ fenomena di au napalan om au nopurimanan. Okito do soira
mimboros o komolohingan do boros suai nga’ opurimanan do tumalup no iti Boros
Kadazandusun tu’ au kotopong ilo boros do suai. Ponoriukan diti oponsol montok
manahak kointalangan do rahung kokomoi do ahal diti. Ogumu ponoriukan pogulu di
nowonsoi kokomoi do korohungan kumaa boros montok isoiso tinaru. Ponoriukan diti
nogi nga’ pinohompit molohing om tangaanak tinaru Kadazan Dusun id Kampung
Minonun.
Tudu Ponoriukan
- Mongilo boros gunoon do molohing soira mogibooboros kumaa tangaanak id
Kampung Minonun. - Mongilo rahung do molohing momoguno boros suai ko’ Boros Kadazandusun
kumaa tangaanak diolo id Kampung Minonun.