loolobi po sukod wagu di ongomulok po miagal do kiumul 13 toun gisom 18 toun.
Ahal diti popokito do lobi ogumu kanto tangaanak i au no koilo moboros do boros
Kadazandusun sabaagi boros pilumaagan monikid tadau. Mulong do ingkaa, haro
kasari piipiro sukod wagu i kakal po momoguno do boros Kadazandusun sabaagi
boros pilumaagan nga sukod wagu nopo diti nga kogumuan no kiumul do 25 toun
gisom 29 toun tumanud data tuhot selidik i pinadalan. Asil ponoriukan nogi nga
pinopokito do haro onom faktor nokuro tu kakal po momoguno o sukod wagu do
boros Kadazandusun id Kampung Lobong-Lobong. Faktor nopo diti nga milo abaagi
kumaa tolu faktor tagayo ii no tu faktor paganakan, faktor posorili om faktor
topurimanan. Montok kopomogunaan boros Melayu nopo nga haro siam faktor
toinsanai om abaagi o faktor diti kumaa apat faktor tagayo miagal do faktor
kowoowoyoon, faktor paganakan, faktor posorili om faktor topurimanan.
Sogu
Tikid-tikid ponoriukan i minaan padalano nopo nga haro o koluhoyon dau sondii.
Miagal nogi do ponoriukan diti tu haro o koluyohon. Mantad dii, haro piipiro sogu i
ponointalang di mononoriuk montok monginsonong ponoriukan id timpu dumontol.
Ponoriukan nopo diti nga pinadalan id iso’ kinoyonon no ii no tu hilo id Kampung
Lobong-Lobong, Kota Belud. Id timpu dumontol nopo nga osonong daa do
poindalanon o ponoriukan miampai popohompit do kinoyonon di lobi ogumu moi do
osoriuk om oilaan kopio o kobolingkaangan id kinoyonon dii loolobi po kokomoi diti
koimogoton boros Kadazandusun. Sumusuhut, kopohompitan do responden toi ko’
rontob soriuk di lobi agayo. Ponoriukan di nakadalan nopo diti nga pinopohompit do
responden i kiumul do 13 toun gisom do 29 toun no. Dadi, okoro o rontob soriuk do
ponoriukan diti. Mantad dilo, ponoriukan id timpu dumontol nopo nga milo momoguno
rontob soriuk di lobi agayo miagal ko’ manganu responden i lobi do 29 toun.
Bagas
Bagas nopo do ponoriukan diti nga kaanu manahak sukuon kumaa tulun posorili
loolobi po tulun id Kampung Lobong-Lobong do nunu o boros di gunoon do
kogumuan sukod wagu id kampung diti. Suai ko’ ii, ponoriukan diti nga manahak nogi
do komilaan kumaa tulun mogiigion do yolo nopo diti nga kaanu mamarahung
kopomogunaan boros do tangaanak om sukod wagu. Kopoindalanan do ponoriukan
nogi diti nga nakaanu manahak sukuon kumaa tinaru Kadazan om Dusun do boros