tinaru nopo diolo nga au nodi gunoon sabaagi boros pilumaagan monikid tadau do
tongotulun diolo. Mantad no da do kopoilaan diti, koilo o tinaru diti do popoingkawas
do goos diolo manampasi do boros Kadazandusun miampai popotungkus do boros
diti kumaa tangaanak moi do kakal yolo momoguno do boros tina mulong pia ogumu
no boros suai i kaanu mamarahung do boros Kadazandusun.
Suai ko’ ilo, ponoriukan diti nogi nga nakaanu mongilo do piipiro faktor nokuro tu
kakal po momoguno o sukod wagu do boros Kadazandusun om faktor momoguno do
boros Melayu sabaagi boros kumoiso’ diolo i gunoon id pilumaagan monikid tadau.
Mantad no do faktor dilo, nakaanu do mongimbulai pomusarahan kumaa mononoriuk
om tulun ginumuan do poingkuro popotilombus diti boros tina tokou moi do au
atagak. Tohuri no, kinopoindalanan do ponoriukan diti nogi nga nakaanu do popoilo
kumaa tulun ginumuan do apasi o boros tinaru diti id timpu dumontol sokiro haro o
topurimanan om goos mantad tinaru diti sondii do popotungkus do boros
Kadazandusun kumaa do sukod wagu. Ahal diti nopo nga iso’ aspek i oponsol kopio
moi do kakal po koilo o sukod wagu do moboros momoguno boros tina id suang
pilumaagan monikid tadau.