Kopointutunan
Tumanud Kamus Dewan Edisi Keempat (2014), boros nopo nga sistom lambang tuni
i gunoon sabaagi do kakamot komunikasi montok do toisoiso’ tinaru toi ko' komuniti.
Gunoon o boros diti suang do koposion miagal do manahak konsep, manahak do
kointalangan om sabaagi do kakamot komunikasi montok do i moboros om i
mokinongou. Suai ko iri, boros nopo nga identiti montok do popokito o toisoiso’ tinaru
dii. Sabaagi poomitanan, Boros Kadazandusun nopo nga identiti montok do tinaru
Kadazan Dusun id pogun Sabah.
Kopointalangan Kobolingkaangan
Kobolingkaangan i nokito nopo nga haro kopomogunoon do Boros Malayu suang
pibarasan tangaanak Dusun id Kampung Malangang Baru montok do moboros
suang do Boros Kadazandusun. Sabaagi poomitanan, “mencuci oku po piring,
sumoluan oku tinu”. Maya poomitanan dii nga momoguno tangaanak do Boros
Malayu maya kopomogunoon Boros Maan Transitif Aktif “mencuci” sabaagi predikat
suang do pibarasan montok do moboros id suang do Boros Kadazandusun. Mantad
dii, okito o kopomogunoon do Boros Malayu kumaa Boros Kadazandusun mantad
aspek morfologi suang do pibarasan tangaanak id Kampung Malangang Baru.
Kopomogunoon Boros Malayu suang do pibarasan tangaanak montok do moboros
do Boros Kadazandusun nopo nga iso’ kobolingkaangan tu ahal nopo diti nga
mamaraag struktur pomogunoon hogot suang pibarasan tangaanak montok moboros
id suang do Boros Kadazandusun.
Tudu Ponoriukan
i. Mongilo rahung Boros Malayu kumaa suang pibarasan tangaanak Dusun
id Kampung Malangang Baru.
ii. Mongintutun faktor-faktor i mamarahung kopomogunoon Boros Malayu
suang pibarasan tangaanak Dusun id Kampung Malangang Baru.Tuhot Ponoriukan
i. Nunu rahung Boros Malayu kumaa suang pibarasan tangaanak Dusun id
Kampung Malangang Baru?
ii. Nunu faktor-faktor i mamarahung kopomogunoon Boros Malayu suang
pibarasan tangaanak Dusun id Kampung Malangang Baru?