Kopointutunan
Tumanud di Pugh (2012), kiwaa tolu taang id suang adat pisasawaan tulun Dusun id
watas Tambunan. Ii no kotimpuun maya do taang momouaboi, sahakoi om taang
kasawaan. Id suang do ponoriukan diti, adat mogongoi id pisasawaan tulun Dusun i
poingion id Kampung Kuala Kaingaran Tambunan nopo nga padalanon id taang di
kumotolu, ii no ontok taang kasawaan toi ko’ ontok timpu pisasawaan. Pinoindalan o
ponoriukan diti montok mongilo nung tulun Dusun id Kampung Kuala Kaingaran
Tambunan kitoilaan po kokomoi adat pisasawaan tinaru diolo sondii id timpu babaino
diti, ii no adat mogongoi.
Kopointalangan Kobolingkahangan
Kinomogoton timpu minanahak do bagas kumaa kopoindalanan adat pisasawaan
tulun Kadazan om Dusun. Maya pongintangan om poninduan kotimpuunon,
kobolingkahangan nopo diti nga adadi id pialatan do tulun Dusun id Kampung Kuala
Kaingaran, Tambunan. Mogingkukuri no dii o ginumu tulun moden popoindalan
koubasanan tinaru sondii loolobi no kokomoi adat pisasawaan om lobi yolo momili do
pisasawaan moden tu’ arahung do pomusarahan tulun babaino diti, lobi otigas, lobi
okuri kopomogunaan do kinoris om kousinan. Dadi’ atalang kopio id timpu baino diti
apagon o mongintong om kaampayat id kapadalanan adat pisasawaan tumanud
koubasanan i pinotungkus id pialatan tulun Dusun id Kampung Kuala Kaingaran,
Tambunan tu’ kumuri no di o ginumu tulun i kakal papadalan om tumanud do adat
dilo. Mantad diti, oponsol kopio o padalanon o ponoriukan diti montok monoriuk nung
tulun Dusun id kinoyonon diti kakal po do kitoilaan kokomoi adat dilo toi ko’
nokosimban no tumanud kinomogoton timpu.
Objektif Soriuk
i. Mongilo taang toilaan tulun Dusun id Kampung Kuala Kaingaran Tambunan
kokomoi do adat mogongoi id pisasawaan
ii. Mongilo paktor i mamarahung taang toilaan tulun Dusun kokomoi adat
mogongoi id pisasawaan