Sompuruan Artikol Jurnal Ponoriukan PISMP Koonuan Mahas 2018 (BKD, SK)

ii. Mongilo paktor i mamarahung taang toilaan tulun Dusun kokomoi
adat mogongoi
Maya kopomorindakan data foom uhot soriuk montok item paktor i
mamarahung taang toilaan tulun Dusun kokomoi adat mogongoi, item C2
kiginumu min i bobos akawas mantad koinsanan item, ii no soginumu do
4.89. Iti nopo nga ingkaa, tu’ koinsanan responden kaakun do koinganan
mampayat id kopoindalanan adat mogongoi nopo nga paktor i bobos
akawas o koonuan do mamarahung taang toilaan diolo kokomoi do adat
diti.
Osokodung nogi o asil diti maya asil kopomorindakan data
ponorubungan i pinoindalan. Maya analisis transkrip ponorubungan, limo
(83%) responden kitoilaan kokomoi adat mogongoi tu’ kiwaa o koinganan
diolo mampayat id kopoindalanan adat diti. Suai ko dilo, analisis
kuantifikasi i pinoindalan papatalang do kekerapan montok tema
koinganan nopo nga bobos ogumu, ii no soginumu do 13. Apat (67%)
tulun mantad responden diti kosokodung do moginggugumu o koinganan
mampayat id kapadalanan adat diti, mogingkakawas nogi o toilaan i aanu.
Songulun responden nokoboros do kasasari nopo nga molohing i adadi
do momuruan montok papadalan o adat diti tu’ kitoilaan om kikoinganan i
ogumu kokomoi kapadalanan adat mogongoi diti.
Osokodung o asil diti maya teori koburuon kognitif Jean Piaget i
papatalang kokomoi do pambalajalan maya koinganan. Hinonggo,
koburuon koilaan sosongulun oinlaab maya do piromutan miampai
posorili (Leny Marinda, 2020). Maya asil ponoriukan diti, oruhangan o
toilaan responden kokomoi adat mogongoi maya do piromutan miampai
komolohingan om pongintangan maamaso mampayat id kapadalanan
adat mogongoi. Soira do ogumu o koinganan mampayat id kapadalanan
adat mogongoi, akawas om koburu di o toilaan responden kokomoi iti
adat mogongoi id pisasawaan tulun Dusun id Kampung Kuala Kaingaran,
Tambunan. Suai ko dilo, ponoriukan i pinoindalan di Pugh (2012) kaanu
nogi do monokodung o asil soriuk diti, ii no kogumuan nopo do asil soriuk
i naanu id ponoriukan disido nga naanu maya do pongintangan om
koinganan sondii id kaampayatan kopoindalanan ababayan kaadat-adato’
tinungkusan tinaru Dusun id watas Tambunan. Paktor-paktor suai i
minamarahung toilaan responden kokomoi adat diti tumanud nuludan
mantad do taang akawas kumaa id taang osiriba nopo di nga paktor