Pomolingkuman
Ponoriukan nopo diti nga kokomoi do koroitan om fonem dialek Liwan i kohompit do
pisuayan koroitan om pisuayan fonem i gunoon do tongotulun i moomoboros dialek
Liwan id watas Tambunan om Ranau, Sabah. Kiwaa tolu kaida ponimungan data i
noguno id suang do ponoriukan diti montok momorindak do data montok maganu asil
ponoriukan. Asil ponoriukan popokito kiwaa 11 tangkob boros di kiwaa pisuayan
koroitan om kiwaa kiwaa pisuayan fonem id ijaan do pimato vokal /o/, /e/, pimato
mora /ii/, pimato konsonon /h/, /w/, /y/ om nogi pimato sigot /’/ i manahak pisuayan
fonem dialek Liwan id watas Tambunan om Ranau, Sabah.
Bagas
Kopoindalanon do ponoriukan diti kaanu manahak bagas di osonong kumaa tulun
Kadazan om Dusun montok mongintutun pisuayan koroitan om nogi pisuayan fonem
dialek Liwan i gunoon id duo watas di misuai do watas Tambunan om Ranau, Sabah.
Mantad ponoriukan diti, alansan daa do kapanahak koilaan om kointalangan di lobi
ouhan om orotian do toinsanan tinaru Kadazan Dusun, mokiikinobos id institut
ponginabasan takawas, mongingia’, mononoriuk om tulun suai i kirahi om aanangan
do minsingilo kokomoi do gana diti loolobi po doid aspek boros. Montok do tinaru
Kadazan Dusun, kasasari daa do kipomusarahan montok mamagatang o
tinungkusan mantad komolohingan diti loolobi po id aspek do boros om koubasanan
moi do au tumalup om atagak.
Sogu
Mantad do asil ponoriukan diti, omilo potilombuson o ponoriukan diti id aspek suai
sabap ogumu aspek suai i milo soriukon kokomoi do boros toi ko’ linguistik kokomoi
do dialek i kiwaa id pogun Sabah. Kotilombuson do ponoriukan diti oponsol montok
koponginlaaban do ponoriukan id aspek do linguistik loolobi po i kohompit do toilaan
kokomoi do dialek. Sogu ponoriukan suai i milo poindalanon montok kotilombuson do
ponoriukan diti nopo nga soriukon o aspek koroitan om rati boros id aspek do faktor
korohungan pisuayan koroitan om pisuayan rati boros dialek Liwan id
kopomogunoon do boros dilo id pilumaagan tikid tadau. Ahal diti tu’, au po nosoriuk
miampai poinralom o faktor korohungan koimbulayan pisuayan koroitan om rati
dialek Liwan id suang do ponoriukan diti. Ahal diti tu’, faktor korohungan pisuayan
koroitan om pisuaya rati dialek Liwan id suang do ponoriukan diti pinointalang