Sompuruan Artikol Jurnal Ponoriukan PISMP Koonuan Mahas 2018 (BKD, SK)

BOROS DOMINAN DO TANGAANAK ID KAMPUNG KEROKOT, TAMBUNAN

CARLEXTUS GODOU

SINIT@JOHN BIN GITOM

JABATAN BOROS KADAZANDUSUN IPGK KENT TUARAN

[email protected]

ABSTRAK

Ponoriukan nopo diti nga poindalanon montok mongintutun do Boros Dominan di gunoon do
tangaanak Dusun Liwan id Kampung Kerokot, Tambunan, Sabah id pibarasan diolo tikid
tadau. Poindalanon nogi o ponoriukan diti montok mongilo songkuro rahung do boros di
gunoon do tangaanak soira id sikul, miampai paganakan om nogi tambalut kumaa do Boros
Dominan diolo. Instrumen di gunoon doid ponoriukan nopo diti nga Soal Selidik montok 44
tulun tangaanak id Kampung Kerokot Tambunan, Sabah. Gatang komilotumboyoon do Alpha
Cronbach montok koinsanai item soal selidik nopo nga 0.767. Naanalisis o data momoguno
do analisis deskriptif. Maya do asil ponoriukan noilaan do Boros Koiso’ i notorimo nopo do
tangaanak nga nosiliu do Boros Dominan di tangaanak doid pilumaagan tikid tadau.
Soginumu 65.9% tangaanak momoguno do Boros Malayu sabaagi Boros Dominan diolo,
22.7% momoguno Boros Tina sabaagi Boros Dominan diolo om 11.4% momoguno Boros
Inggiris sabaagi Boros Dominan. Mantad do asil ponoriukan, pomogunaan nopo do Boros
Malayu id sikul, miampai paganakan om miampai tambalut nga id taang di akawas kopio.
Okuri o pomogunaan do Boros Tina id sikul om miampai tambalut. Haro pomogunaan do
Boros Tina id suang do paganakan nga kakal id taang di osiriba no. Mantad diti, milo dii
lingkumon do Boros Dominan nopo do tangaanak id Kampung Kerokot, Tambunan, Sabah
nga Boros Malayu. Pinoposogu o mononoriuk do poingkawason daa o pomogunaan do Boros
Tina soira miampai paganakan tu Boros Koiso’ no i agayo potensi do kosiliu Boros Dominan
di tangaanak. Nung amu poia’on o Boros Tina diti mantad id walai nga osiriba di o liwang di
tangaanak do minsingilo boros diti tu’ okuri o pomogunaan do Boros Tina diti id sikul toi ko’
miampai tambalut.

Hogot Toponsol: Boros Koiso’, Boros Dominan, Boros Tina