daa di kawagu o sunduan popotonduli om nogi manamong do Boros Tina doid
potitikid mogigion mooi do momoguno yolo do lobi gumu Boros Tina doid pilumaagan
tikid tadau. Mantad diti do au daa di otukaan o kaantakan di kororosi do tinaru tokou
miagal ko’ isu atalup o boros tina miagal di pinoruput do Borneo Digest ontok 24
Gomot 2016, i kiuhu do Bahasa Dusun Pupus Tahun 20 45. Ahal diti nga kopisudong
nogi do boros “Atagak Boros, Atagak Tinaru”.
Tumilombus, ponoriukan nogi diti nga kapanahak do bagas kumaa komuniti
sikul, paganakan om nogi tambalut di tangaanak. Ahal nopo diti nga sabap no do
noilaan di mononoriuk o aspek di mangarahung do Boros Dominan di tangaanak om
koinsanai aspek diti nga manahak do rahung di agayo kopisudong do Teori
Behaviourisme di pinointalang kokomoi do rahung posorili kumaa koburuon di
tangaanak. Mantad no diti do nuru daa di o komuniti sikul, paganakan om tambalut di
tangaanak do momoguno Boros Tina di lobi gumu doid pilumaagan diolo tikid tadau.
Ahal nopo diti nga mooi do koingkawas o kabaalan boros di tangaanak om nogi
kotilombus o pomogunaan Boros Tina kumaa sukod wagu mooi do amu olikupan do
boros tinaru do suai.
Bagas di sumusuhut do ponoriukan nopo diti nga doid pongia’an Boros
Kadazandusun id sikul. Nuru daa do potosolon kopio di mongingia’ o pomogunaan
do Boros Kadazandusun mooi do koburu o tangkob boros di tangaanak om nogi
kabaalan wara diolo nga koingkawas. Nuru nogi daa o mongingia’ popogumu do
strategi om teknik pongia’an mooi do lobi ouhan i tangaanak do minsingilo boros diti
do lobi alaab om poinralom. Suai ko ii, data di naanu nogi diti nga kaanu manahak do
pongintangan kumaa do tongotulun doid kinoyonon suai mooi do manamong Boros
Tina diolo mooi do amu kotoguang isu opunso. Kaanu nogi o ponoriukan diti
manahak do iso’ pongintangan nunu i osiliu do Boros Tina id timpu dumontol nung au
gunoon, tamangan om poburuon doid timpu diti.
Sogu
Mantad do ponoriukan diti, haro o piipiro sogu ponoriukan sumusuhut i milo
padalanon montok popoingkawas do pomogunaan Boros Tina do tangaanak sukod
wagu loolobi po montok tangaanak sukod wagu. Ponoriukan nopo di milo padalanon
nga kokomoi do nunu faktor di mangarahung pomilian do boros doid pilumaagan do
tangaanak tikid tadau. Soira noilaan o boros di tangaanak, milo nogi intangan nunu o
faktor pomilian do boros di tangaanak doid pibarasan diolo tikid tadau. Sumusuhut
nopo nga milo nogi kokomoi do persepsi tinaru Kadazan Dusun kokomoi do
pomogunaan do Boros Tina doid pilumaagan tikid tadau. Mantad diti do oilaan dii