nunu pomuumusorou di tongotulun doid koponontuan diolo nunu o boros di gunoon
diolo kumaa tangaanak sukod wagu. Suai ko ii, milo nogi poindalanon o ponoriukan
kokomoi do taang kabaalan do tangaanak kokomoi Boros Tina toi ko’ Boros
Kadazandusun.
Pomupus
Tumanud asil ponoriukan di nowonsoi okito do nodimpot o objektif ponoriukan di
napalan. Suai ko ii, koinsanai tuhot soriuk nga nosimbar nogi miagal ko’ “Nunu o
boros dominan do tangaanak id Kampung Kerokot, Tambunan id pilumaagan tikid
tadau?” om “Songkuro rahung do boros i gunoon do tangaanak id sikul, miampai
paganakan, om miampai tambalut doid boros dominan do tangaanak id Kampung
Kerokot, Tambunan?”. Tumilombus, miampai pointongkop nakaanu o ponoriukan diti
manahak koilaan di kiguno om kasanangan kumaa mogigion id Kampung Kerokot,
Tambunan kohompit no komolohingan om tangaanak id kampung diti kokomoi
poingkukuro no o taang pomogunaan do boros tina doid tangaanak manaku okuri no
momoboros toi ko’ ogumu po. Ponoriukan nogi diti nga kaanu mongukab
pomusarahan om nogi popoingkawas do sunduan manamong do boros tina mooi do
amu opunso. Mantad no diti do kaanu daa o koinsanai tongotulun id kinoyonon diti
do mogisokodung montok momoguno om popoburu do Boros Tina mooi do amu
atagak toi ko’ opunso.