Kopointutunan
Tinaru Kadazan Dusun momoguno boros siriban suang pilumaagan om kaantakan
diti kopokito do koubasanan om kolinuudan tinaru kaantakan do moboros tu
momoguno boros di au koporuol do wokon. (Rosliah Kiting, 2017). Tumanud di Keraf
(2007), kawo boros siriban abaagi kumaa tolu. Ii nopo nga ironi, sinisme om
sarkasme. Tikid kawo do boros siriban diti popokito do pisuaian pointantu maamaso
momoguno boros suang pibarasan. Id kaantakan diti, komolohingan Dusun id
Kampung Rugading Baru, Kota Marudu nogi nga ointalang o’ kopomogunaan siriban
id pilumaagan montok popokito do topurimanan di mogikaakawo miagal ko’ araatan,
aanangan om nogi au aanangan. Mantad no dii, nowonsoi o’ ponoriukan diti montok
mongilo om mamarati koubasanan tinaru Dusun miampai lobi aralom kokomoi do
woyo boros tinaru Dusun id aspek do boros siriban.
Kointalangan Kobolingkangan
Komolohingan tinaru Dusun id Kampung Rugading Baru, Kota Marudu momoguno’
ogumu boros siriban id pilumaagan tikid tadau. Korotian kokomoi woyo boros siriban
diti kaampai do proses di kompleks tu mogikaakawo, minog interprestasi korotion om
kifungsi pointantu tu Keraf (2007), minoboros do siriban nopo nga kikawo ironi,
sinisme om sarkasme. Mantad no do kointalangan kobolingkangan ngawi dii,
nokoindalan o’ ponoriukan diti montok monimbar ngawi do poguhatan kokomoi do
boros siriban di kaampai do mongilo kawo, momohuyad rati siriban om fungsi boros
siriban komolohingan id Kampung Rugading Baru, Kota Marudu.
Objektif
- Mongilo kawo boros siriban di gunoon o’ komolohingan id Kampung Rugading
Baru Kota Marudu. - Mongilo rati boros siriban di ginuno o’ komolohingan id Kampung Rugading Baru
Kota Marudu. - Monguyad fungsi boros siriban di gunoon o’ komolohingan id Kampung Rugading
Baru Kota Marudu.
Tuhot Ponoriukan
- Nunu kawo boros siriban di gunoon o’ komolohingan id Kampung Rugading Baru
Kota Marudu? - Nunu rati boros siriban di ginuno o’ komolohingan id Kampung Rugading Baru
Kota Marudu?