Pomolingkuman, Bagas Om Sogu
Asil ponoriukan kopokito adala kopomogunaan boros siriban komolohingan Dusun id
Kampung Rugading Baru, Kota Marudu. Mantad ponoriukan, soginumu 19 mantad
27 boros siriban pointunud do kawo boros siriban suang Kerangka Keraf (2007). Asil
nogi kopokito do koinsanan siriban kikorotian di aralom om pointantu tumanud
konteks om boros siriban di noguno kifungsi sabaagi boros kointalangan, kookunan
om ponuhuan montok manahak pononsunudan, pogoduhan, kopoilaan, kookunan
om ponuhuan.
Sogu poginsanangan i milo padalanon ontok timpu dumontol nopo nga
popotilombus ponoriukan maya koinlaaban ponoriukan di aiso rontob toi ko’ amu
poinlongkod do isoiso poginsamakan tu mantad asil okito kiwaa kopomogunaan
boros siriban kirooromu do minggaso (humor) suang pilumagaan doid Boros Dusun.
Mantad dii, osonong tomod daa osoriuk o’ kawo boros siriban diti.
Oponsol o’ ponoriukan diti tu nakaanu manahak koinlaaban do toilaan kumaa
mokiikinobos om tinaru sondii loolobi no sukod wagu kokomoi korotian do
koubasanan boros tinaru Dusun id aspek woyo boros. Suai ko ii, ponoriukan diti
nosiliu nogi do korohungan sukuon montok impohon stilistik Boros Kadazandusun
doid aspek woyo boros om nosiliu do sukuon di kaanu popoingkawas kualiti pogia’an
linguistik Boros Kadazandusun.