Kiwaa mogisuusuai kaida’ montok monimung koilaan di onuon doid
ponoriukan. Ponoriukan nopo diti nga iso ponoriukan kes. Sabap nopo nokosilihon
do ahal diti nga sabap do haro iso kes id nonggo haro nokosimbanon do adat minidu
pogun di pogulu om baabaino id kinoyonon ponoriukan. Ponginsamakan nopo do
ponoriukan diti nga maya kualitatif id nonggo minomoguno i mononoriuk do
instrumen ponorubungan sabaagi main-instrumen. Instrumen suai nopo nga miagal
ko instrumen pongintangan om pomurindakan dokumen. Tumanud di Lee Keok
Cheong et, al, (2018), ponoriukan kualitatif nopo nga ponginsamakan di asaru do
pioniton do kontruktivis sosial i popohontol do woyo realiti di winonsoi maya sosial.
Ponoriukan nopo maya reka bontuk diti nga kakomoi ahal momorekod, momonsoi
analisis om mogihum rati di poinralom kokomoi suang di soriukon.
Ponoriukan nopo diti nga popohompit do mogiigion id Kampung Kaingaran,
Tambunan Sabah. Montok do papatantu do responden id koponimungan data,
momoguno o ponoriukan diti do persampelan kitudu. Tumanud di Chua Yua Piaw
(2011), maya do persampelan diti pilion o piipiro responden di kiwoyo pointantu om
haro piagalan i kosudong do kinaantakan om tudu ponoriukan. Mantad diti sampel
nopo di noguno id ponoriukan diti nga soginumu 3 responden. Responden nopo nga
id tinimungan umul 45 toun gisom 65 toun. Tudu nopo nokopomilian do responden id
tinimungan umul diti nga, saasabap no do ogumu o koinganan diolo kokomoi adat
minidu pogun. Haro nogi piipiro komolohingan suai mantad do kategori umul dilo di
onuon sabaagi do informan montok do kosokodungan om kogonopon do data di haro
pionitan do tudu ponoriukan.
Proses mongurindako nopo data id ponoriukan diti nga tumanud do proses
pomurindakan data kualitatif di Miles om Huberman (1992). Rajah nopo dii nga okito
id siriba.