maya aplikasi whatsapp id tinimungan Whatsapp do kampung sabaagi bukti
nokosimbanon do laang kopoilaan ontok haro minidu pogun.
Adat nopo di natagak nga adat papaakan do rusod. Di laid nopo nga nuru
paakanon i rusod ontok koturu tadau toi ko’ ontok tadau monumpoli tu’ otumbayaan
yolo gumuli i rusod do mongoi akan tu’ iri no o tadau tohuri di rusod id pomogunan
pogulu i mundaliu id pomogunan suai. Noboros nogi iti maya Utusan Borneo Online
(2020), do nuru potounda’on o taakanon di rusod solinaid turu tadau. Sundung do
ingkaa, aiso nodii o adat diti id timpu diti. Adat nopo kawagu di natagak nga adat
papataid do sogit. Maya nopo ponorubungan nga haro o adat papataid do sogit
kalapas do tadau koturu. Ii nopo nga wonsoyon do paganakan di notongkiadan. Iti
nopo nga moi do monguhup o sunduan di minidu pogun do popoinsonong tanom-
tanom id kampung. Id timpu diti, natagak nodii ii. Aiso nodii i momonsoi do adat
papataid do sogit.
Tumilombus nopo nga kokomoi faktor di nakarahung do kinosimbanon do
adat ontok haro minidu pogun id Kampung Kaingaran, Tambunan. Faktor
kinosimbanon di kumoiso nopo nga faktor kinosimbanon do kotumbayaan.
Kotumbayaan di laid nopo nga kotumbayaan tradisional id nonggo ritual nopo ontok
haro minidu pogun nga puruanon di bobolian. Soira do nokotorimo o tongotulun do
kotumbayaan id bontuk agama, laang sumambayang nopo dii nga nokosimban tu
katanud do tituduk di agama. Faktor kumoduo nopo i minamarahung do
kinosimbanan do adat nga faktor kinoingkokoton do teknologi. Adat nopo di
nokosimban maya rahung teknologi nga adat popoilo, id nonggo id laid nopo nga
momoguno tagung montok popoilo tulun kampung. Id timpu diti, momoguno nodii do
telepon kandai montok popotongkop do maklumat toi ko’ popoilo do haro minidu
pogun. Faktor kinoingkokoton do koposion nga iso nogi faktor di nakarahung do
kinatagakan adat. Iti nga okito nogi maya pongintangan di mononoriuk id nonggo
ogumu nodii o tulun id Kampung Kaingaran di poinkaraja om poingion id labus watas.
Ii poogi do au no yolo katanud om kokito do adat soira haro minidu pogun id
kampung.
Id kolimpupuson, koinsanai nopo adat di nokosimban om natagak dilo nga
minumangtagak id bontuk Sinkretisme. Sinkretisme nopo nga iso woyo sumimban di
mogot-logot saasabap do iso koundolihon koubasanan tu’ au milo ii do insan-insan
do kosimban. (Halina Sendera Mohd.Yakin, 2017).