Kopointutunan
Boros nopo nga’ kiguno montok popoimbulai toi ko’ mamadadi isoiso’ piromutan id
sorili do tinimungan toi tulun ginumuan. Boros nogi nga’ kiguno sabaagi do manahak
om maganu toilaan, mogio’olos do tua pomusarahan om nunu nopo ii nuru do haro
piromutan. Id Sabah nopo nga’ kogumuan mantad tinaru Kadazandusun, dadi boros
dominan nopo dando di gunoon nga’ Boros Kadazandusun (BKD). Sundung po tu do
boros sukuan peribumi Sabah nopo nga’ ginuno miampai poinlaab om sinandadan
nga’ mundali nodii iti soira do nadadi o Boros Malayu sabaagi do boros piromutan id
sikul-sikul vernakular, hinonggo do isiso’ no toud pondidikan i manahak liwang
kumaa tangaanak peribumi Sabah maganu pondidikan formal (Dayu Sansalu 2008).
Kagu nopo nga’, ontok nopo dii di toun 2005, nokosuang o BKD diti sabaagi iso’
boros di mumang no punso tumanud di pinalabus do UNESCO. Mantad diti do
pinoindalan o ponoriukan diti montok mongilo kopogisuusuaian boros dominan di
gunoon do molohing sabaagi boros gunoon kumaa tangaanak id walai om nogi
mongilo faktor-faktor di mamarahung do molohing momoguno tikid boros dii id
Kampung Togudon Penampang Sabah.
Kointalangan Kobolingkahangan
Pogun tokou nopo nga’ minumang buru’ tumanud do timpu. Dadi ingkaa nogi iti
boros. Soira do imuaian tokou nga’ Boros Kadazandusun nopo diti nga’ kumurikuri
nodii o mobooboros sundung po tu do tinaru nopo diti nga’ ogumu po ko mantad
tinaru suai i poingion do hiti id pogun Sabah nga’ maid laid ogumu nodii o molohing
di moboros do boros suai ko mantad Boros Kadazandusun kumaa tangaanak loolobi
no do Boros Malayu tu boros nopo gia diti nga’ nadadi do boros kabansaan i gunoon
doid nunu nopo abaabayan om urusan rasmi. Iso’ isu di okito do hiti nopo dii nga’
boros suai monumporonok diti Boros Kadazandusun. Id Kampung Togudon
Penampang nopo nga’ kiwaa i orongouku do momoguno do Boros Kadazandusun
nga’ somonu do momoguno do Boros Malayu. Dadi mantad no diti do mongilo daa
kopogisuusuaian boros dominan di gunoon do molohing sabaagi boros gunoon
kumaa tangaanak id walai id Kampung Togudon Penampang om nunu kopio faktor-
faktor di mamarahung do molohing momoguno boros dii id pibarasan tikid tadau
kumaa tangaanak.
Tudu Ponoriukan