i. Mongilo kopogisuusuaian boros dominan di gunoon do molohing sabaagi
boros gunoon kumaa tangaanak id Kampung Togudon Penampang,
Sabah.
ii. Mongilo faktor-faktor di mamarahung do molohing momoguno boros
gunoon dii id pibarasan tikid tadau kumaa tangaanak id Kampung
Togudon Penampang, Sabah.Tuhot Ponoriukan
i. Nunu boros dominan di gunoon do molohing sabaagi boros gunoon kumaa
tangaanak id Kampung Togudon Penampang, Sabah?
ii. Nunu faktor-faktor mamarahung do molohing momoguno boros dominan idi
sabaagi boros gunoon id pibarasan kumaa tangaanak id Kampung Togudon
Penampang, Sabah?
Metodologi Ponoriukan
Ponoriukan nopo diti nga’ ponoriukan tinjauan hinonggo do mongilo kopogisuusuaian
boros dominan di gunoon komolohingan sabaagi boros gunoon kumaa tangaanak
om mongilo faktor-faktor di mamarahung do molohing momoguno boros gunoon dii id
pibarasan tikid tadau kumaa tangaanak. Tumanud di Kraemer (1991) id suang di Lee
Keok Cheong et al. (2018), minongintutun do tolu kawo ponoriukan tinjauan om koiso
nopo nga’ ponoriukan diti gunoon montok papatarang maya kuantitatif id aspek di
natantu montok isoiso’ populasi. Koduo nopo, data di gunoon id ponoriukan diti nopo
nga’ aanu mantad tulun ginumuan. Kotolu nopo dii nga’ momoguno soboogian
mantad populasi di nopili’ hinonggo do koonuan ponoriukan milo momonsoi
generalisasi kalapas dii. Dadi mantad no diti do ponoriukan nopo di poindalanonku
nga’ kosudong do momoguno ponoriukan tinjauan tu momoguno oku do sampel
mantad populasi di agayo toi ogumu.
Montok nopo do mongilo kopogisuusuaian boros dominan di gunoon do
molohing sabaagi boros gunoon kumaa tangaanak id walai nga’ momoguno oku do
foom uhot soriuk. Dadi maya nopo do tisuli mantad do responden dii, okito indo
kopogisuusuaian boros dominan sabagai boros gunoon kumaa tangaanak om nogi
ginumu toi piatus tikid boros di gunoon. Iti nopo nga’ momoguno kaida kuantitatif.