nga’ koinsamakan topurimanan i kopoimbulai do korotian, kobinsianan, om empati
kumaa do wokon. Dadi id isoiso piromutan dii nuru do kiwaa iso boros di gunoon ii
kaanu popirati goduuduo tulun. Mantad dilo do sokiro misuai o boros om au kopirati
toi au koilo do moboros di boros di gunoon do mikoruhang dii nga’ momili indo iyolo
do iso’ boros di goduuduo nga’ karati om koilo momoguno boros dii. Miagal
poomitanan, sokiro tulun mantad tinaru Kadazandusun ii au koilo moboros do Boros
Cina kasawo do tulun mantad tinaru Cina ii au koilo do moboros Boros
Kadazandusun nga’ momili indo do momoguno do boros di goduuduo nga’ karati om
koilo do momoguno miagal Boros Malayu toi Inggilis.
Pogibabarasan Om Pomolingkuman
Sogu Ponoriukan Tumilombus
Mantad do ponoriukan diti, haro di o pipiro sogu montok ponoriukan di sumusuhut i
milo poindalanon sabaagi do roromut kumaa do ponoriukan diti miagal do:
Popoindalan do ponoriukan diti id piipiro kampung toi ko’ id taang di lobi
akawas miagal ko id taang do watas toi pogun. Sumusuhut, mongilo bagas
kopomogunaan do Boros Kadazandusun sabaagi boros gunoon id walai kumaa
kalantayan akademik tangaanak id sikul miagal do bagas kopomogunaan diti boros
kumaa do pambalajaran Boros Malayu. Potilombus, mongilo laang-laang di milo do
gunoon montok popoingkawas do kopomogunaan Boros Kadazandusun sabaagi
boros gunoon kumaa tangaanak id walai. Kaagu nopo nga’, mongintutun boros dii
gunoon do tangaanak kumaa do tulun ginumuan id posorili toi kumaa tambalut diolo.
Bagas
Ponoriukan nopo diti nga’ popoimbulai piipiro bagas montok do tulun ginumuan,
molohing, om mokiikinobos Institut Pendidikan Guru (IPG). Iti nopo ponoriukan nga’
popoimbulai do tua’ pomusarahan kumaa tulun ginumuan kokomoi diti
kopomogunaan boros dominan sabaagi boros di gunoon do molohing sabaagi boros
gunoon kumaa tangaanak. Dadi mantad nopo do ponoriukan diti nga’ oilaan do tulun
ginumuan o faktor-faktor di mamarahung do kopomogunaan do tikid boros gunoon di
pinili’ dadi manahak dando do idea poingkuro do popotimporon do kopomogunaan
boros tina sabaagi boros gunoon maya faktor di nakatayad, sabab soira do oilaan
faktor nga’ oilaan toi kiwaa no giando toilaan di koimbulai mantad pomusarahan
kokomoi do poingkuro monolibamban isoiso ahal dii.