Sumusuhut, manahak bagas kumaa do molohing lolobi no iti molohing
mantad tinaru Kadazandusun hinonggo do manahak topurimanan kumaa diolo do
mupus om popotungkus do momoguno diti Boros Kadazandusun sabaagi do boros
dominan ii gunoon id pibarasan kumaa tangaanak tikid tadau mooi do au atagak iti
boros tumanud timpu.
Kaagu nopo nga’ kumaa mokiikinobos Institut Pendidikan Guru (IPG)
hinonggo do ponoriukan diti kaanu toi kopongukab idea kawawagu montok do
ponoriukan id timpu dumontol lolobi no kopio doid roromut ponoriukan diti. Suai ko
ilo, iti nogi nga’ manahak do toilaan kumaa diolo kokomoi do status do boros
Kadazandusun loolobi no mokiikinobos ii maganu do major BKD om faktor-faktor ii
kapamarahung do kopomogunaan tikid boros dii.
Pomolingkuman
Sabaagi do pomolingkuman, ponoriukan nopo diti nga’ kaanu daa do manahak
bagas di osonong kumaa tulun ginumuan, komolohingan, om mokiikinobos id IPG.
Dadi id ponoriukan diti nakanu do pinopokito do boros dominan di gunoon do
molohing sabaagi boros gunoon kumaa tangaanak om faktor-faktor di mamarahung
diolo do momoguno boros dominan di sabaagi boros gunoon kumaa tangaanak id
Kampung Togudon Penampang, Sabah. Kotohurionon nopo nga’ ponoriukan nopo
diti nga’ nakaanu monimbar do tuhot soriuk om momodimpot tudu ponoriukan miagal
di nakatayad laid doid gulu ii do ponoriukan diti.