Kopointutunan
Tulun Kadazandusun nopo nga nointutunan sabaagi tinimungan di obinpantang do
kooturan-kooturan adat Kadazandusun. Adat-adat nopo di pantangon nga miagal do
adat pisasawaan, mogontian, kapatayon, momolobong om suusuai po (Nazarudin
Zainun & A.S. Hardy Shafil, 2017). Sogit nopo nga iso kooturan adat toi ko’ ukum di
poontokon kumaa tulun di nokopomonsoi do kasalaan adat. Sogit nogi diti nga iso
koubasanan tulun Kadazandusun montok do mokinsian toi ko’ mokiampun kumaa
tulun ginumuan tu nokopomonsoi kowoowoyoon tangaraat. Kiwaa mogisuusuai sogit
i poontokon kumaa sosongulun i nokopomonsoi do kasalaan, miagal ko’ manahak
songinan do manuk gisom do songinan do karabou tumanud do ginayo kasalaan di
nowonsoi (Rita Lasimbang, 2013). Kooturan-kooturan adat pisasawaan nopo dii nga
mogisuai-suai tumanud do watas toi ko’ kampung. Kogumuan tulun id Kampung
Bundu Tuhan nopo nga mantad tinaru Dusun om kakal po mamantang do kooturan
adat id kampung diti. Ponoriukan nopo diti nga montok monoriuk ahal kokomoi do
sogit pitas id adat pisasawaan tinaru Dusun id Kampung Bundu Tuhan Ranau,
Sabah. Otumbayaan o tinaru Dusun do kapanahakan sogit nopo nga iso o
ponongkotanda’ do mamantang do adat om mokinsiou mantad kowoyowoyoon di
amu katanud do kooturan adat.
Kointalangan Kobolingkangaan
Koposion tulun tadau baino nopo nga nakatanud do koburuon do pomogunan.
Koburuon pomogunan diti mogowit do koburuon ralan momumusorou om
kowoowoyoon do tulun. Haro sukod wagu di amu otumbayaan om mamantang do
adat loolobi po id adat pisasawaan. Ahal diti manahak kobolingkangan kumaa sukod
wagu do koimbayat do kopomonsoi woyo di tangaraat i misulak mantad do kooturan
adat pisasawaan pogulu do manansawo. Suai ko’ ii, ogumu nogi sukod wagu di amu
koilo kokomoi do kawo-kawo om bontuk-bontuk sogit pitas id adat pisasawaan tinaru
Dusun. Ahal diti kapanahak kobolingkangan kumaa tinaru Kadazan om Dusun loolobi
po id suang paganakan sondii nung amu pantangon iti kooturan adat pisasawaan.
Mantad no dilo, koimbulai o angkab om idia montok monoriuk do komilaan kokomoi
sogit pitas id adat pisasawaan tinaru Dusun.