tusin. Ponoriukan di Feaddora Janne Rinus (2018) nopo nga mongilo kosimbanon
adat sogit di pogulu om baino, mongilo kapansalan adat sogit kumaa tinaru Dusun
babaino om momorindak pomusarahan tulun id kampung dii kokomoi kowoyowoyoon
adat sogit id timpu babaino.
Ponoriukan di Syamsul Azizul Marinsah, Suraya Sintanga, Abdul Hair Beddu
Asis, Abg Mohd Razif Abg Muis, Mohd Anuar Ramli (2020) nopo nga popokito do
kounalan adat sogit id koposion tinaru Kadazan Dusun. Sogit nogi nga iso kaantakan
mogkorot montok poposogit do pomogunan mantad kaantakan di tangaraat.
Mogkorot nogi diti nga kirati ponowoli raha montok mokiinsiou mantad kasalaan di
nowonsoi. Id suang do ponoriukan di Ronnie Stefhannie Nasrin & Dan Paul
Porodong (2015), pisasawaan do duo tulun (kusai om tondu) i amu katanud do
kooturan adat pisasawaan nopo nga iso pisasawaan di aiso kookunan. Tinaru
Sinobu om Sukang diti amu papawasa do pisasawaan misomok piobpinayan. Kawo-
kawo kasalaan nopo nga pisasawaan pinsan ungkiat, pinsan induo om pinsan intalu.
Bontuk sogit di oontok nopo nga tayam miagal do wogok om kakamot miagal ko’
kakanan, dangol, tandus om suusuai po.
Maya do ponoriukan ngawi dilo, okito do aiso po ponoriukan kokomoi do sogit
pitas id adat pisasawaan tinaru Dusun id Kampung Bundu Tuhan Ranau, Sabah.
Sundung do haro ponoriukan kokomoi do sogit pitas id adat pisasawaan nga kawo
om bontuk sogit dii misuai-suai tumanud do kinoyonon om koubasanan isoiso tinaru.
Responden Om Kinoyonon Ponoriukan
Id suang do ponoriukan diti, responden nopili’ mantad Kampung Bundu Tuhan
Ranau, Sabah. Ginumu responden i manahak komi montok ponoriukan diti nopo nga
soginumu do tolu tulun. Koinsanai do responden diti nga id tinimungan do tinaru
Dusun om abaal kokomoi do sogit pitas id adat pisasawaan tinaru Dusun. Kinoyonon
do ponoriukan nopo nga id Kampung Bundu Tuhan Ranau, Sabah.
Rika Bontuk Ponoriukan
Rika bontuk di gunoon montok papadalan do ponoriukan diti nopo nga ponoriukan
etnografi. Ponoriukan etnografi nopo nga ponoriukan i gunoon montok monoriuk do
sosiologi isoiso koubasanan, adat, kotumbayaan, ukum om kowoyowoyoon (Ain
Nazri, 2018). Ponginsamakan di gunoon id ponoriukan diti nopo nga ponginsamakan