Sogu
Tumanud asil ponoriukan i naanu momoguno instrumen ponoriukan, kiwaa piipiro
sogu montok kotilombusan do ponoriukan diti. Montok do ponoriukan tumilombus,
milo o mononoriuk wagu id timpu dumontol do monoriuk kokomoi do sogit-sogit suai
id adat pisasawaan id kampung ponoriukan. Suai ko’ ii, montok ponoriukan
tumilombus, popoindalan ponoriukan di lobi aralom kokomoi do adat sogit diti.
Sabaagi poomitanan, monoriuk kokomoi do karaaralano kaantakan monogit, rinait
maso mogkorot om ogumu po suai mooi do kaanu papaasil data di lobi ogumu. Milo
nogi mononoriuk wagu do monoriuk sogit pitas id adat pisasawaan tinaru suai. Milo
nogi monoriuk wagu do monorik ukum adat tinaru Kadazan Dusun miagal ko’ sogit
babas, sogit sumbang, sogit lapau, sogit miatom, sogit manggual gong, sogit tudong
om ogumu po suai. Milo nogi monoriuk wagu kokomoi do ukum om adat koubasanan
tinaru Kadazan Dusun moi do koingumu o ponoriukan kokomoi do adat koubasanan
tinaru Kadazan Dusun.
Bagas
Kopoindalanan nopo ponoriukan diti nga kaanu manahak bagas di osonong id gana
pondidikan, mononoriuk wagu om sukod wagu tinaru Kadazan Dusun. Ponoriukan
diti kaanu manahak bagas di osonong id gana do pondidikan. Id gana do pondidikan
haro pongia’an kokomoi do koilaan tadon tinaru Kadazan om Dusun. Ponoriukan diti
milo gunoon id pongiaan montok mongilo puun paganakan om adat koubasanan
tinaru Dusun. Ponoriukan diti kaanu nogi popoingumu buuk sukuon do BKD montok
sikul tosiriba, sikul takawas om montok mokiikinobos id Universiti. Ponoriukan diti
kaanu nogi manahak bagas di tosonong kumaa mongingia BKD do papasarabak
adat koubasanan kumaa tangaanak sikul maya do pongiaan BKD. Ponoriukan diti
kaanu nogi manahak bagas di tosonong kumaa mononoriuk wagu miampai poposiliu
do ponoriukan diti sabaagi do susukuon toi ko’ montok ponoriukan literatur id
ponoriukan diolo. Ponoriukan diti kapanahak nogi bagas tosonong kumaa sukod
wagu do mongilo kawo-kawo om bontuk-bontuk sogit pitas id adat pisasawaan tinaru
Dusun. Kaanu nogi manahak bagas tosonong montok komolohingan do paparati di
sukod wagu kokomoi do kooturan adat pisasawaan montok mongilag do haro
piuhangan id pialatan do kopinsan.