Sogu montok do mongingia’ nopo nga’ mositi do koilo momoguno motivasi intrinsik di
tangaanak sikul id strategi P&P mooi do kirahi i tangaanak id pambalajalan kabaalan
moboros boros Kadazandusun. Rahi nopo di taralom nga’ kopongunsub diolo
minsingilo boros diti sogigisom om okon ko’ id posorili linimput pambalajalan tomod
nga’ id soliwan linimput pambalajalan nogi. Suai ko’ ii, mongingia’ mositi nogi do
mongintutun nunu i kopongunsub motivasi di tangaanak do minsingilo Boros
Kadazandusun mooi do koingkawas koinabasan di tangaanak sikul id boros diti.
Kolimpupuson
Motivasi di tangaanak sikul Toun 6 id pambalajalan Boros Kadazandusun nopo nga’
akawas. Koilaan di naanu id ponoriukan diti popokito do motivasi nopo nga’ milo
gunoon di mongingia’ montok mongunsub tangaanak sikul do minsingilo Boros
Kadazandusun. Taang koinabasan di tangaanak okon ko’ narahung do motivasi
tomod nga’ haro nogi kopongoobian do faktor suai di mongunsub pambalajalan
Boros Kadazandusun di tangaanak sikul. Montok do sogu, mongingia’ Boros
Kadazandusun mositi do koilo nunu i kopongunsub di tangaanak sikul diolo,
momonsoi ponoriukan sumusuhut montok mogilo motivasi pambalajalan boros
Kadazandusun di lobi aralom om momonsoi ponoriukan sumusuhut montok
mongintutun kobolingkaangan di mangantob pambalajalan Boros Kadazandusun om
koilaan faktor suai di mamarahung pambalajalan diolo.