Kopointutunan
Kiulu nopo nga iso’ watas tokoro soginayo 647kilometer persegi. Haro 106 kampung
id suang do watas diti om kiikiro 50 000 tulun mogigion. Kogumuan di mogigion id
watas Kiulu nopo nga’ tinaru Dusun Tagahas. Haro o mogikaakawo koubasanan di
kakal po do gompion do tinaru Dusun Tagahas id suang do watas diti miagal ko
tuunion, sayau om nogi basaan koubasanan. Basaan koubasanan do watas Kiulu
nopo nga’ Sinulamba. Basaan nopo diti nga’ nokoimbulai om nointutunan ontok toun
20 16 soira nakalantoi i Tati Hyellene Danius do piboi’an Unduk Ngadau nayatan
watas Tuaran minamagarung do basaan koubasanan Sinulamba mantad watas
Kiulu.
Kapatayadan Kobolingkangan
Haro o piipiro kobolingkangan di nokopongunsub do ponoriukan diti. Kobolingkangan
dii nopo nga’ kaampai no do kobolingkangan miagal ko’ au atalang kopio o tadon do
basaan koubasanan Sinulamba id watas Kiulu. Ahal nopo diti nga adadi sabap
kawaawagu nogi nakasarabak iti basaan koubasanan ontok toun 2016 om aiso po
ponoriukan kokomoi do basaan koubasanan Sinulamba mantad watas Kiulu diti.
Mantad dii, au di oilaan nontonodon kinonuan ngaran do basaan koubasanan
Sinulamba mantad watas Kiulu. Suai ko iri, toinsanan boogian id suang do basaan
koubasanan Sinulamba miagal ko’ rika bontuk, motif, rinda om nogi warana nopo
nga’ misuai mantad basaan koubasanan id watas suai nga’ amu oilaan kopio o nunu
ngawi komoyon-komoyon do tongoboogian id suang do basaan diti. Kobolingkangan
sumusuhut nopo nga au nogi oilaan laang di kotunud montok mamagarung do
basaan diti tu soira nointutunan om nakasarabak o basaan diti, adala rika bontuk do
basaan diti i nokito do mononoriuk om mantad dilo osonong daa mongilo kopio laang
mamagarung do basaan koubasanan diti di kotunud.
Tudu Ponoriukan
i. Mongilo nontodon kinonuan ngaran do basaan koubasanan Sinulamba id
watas Kiulu.
ii. Mongilo rati poinlisok tikid boogian id suang do basaan koubasanan Sinulamba
id aspek rika bontuk, motif, rinda om warana.
iii. Mongilo laang mamagarung basaan koubasanan Sinulamba mantad watas
Kiulu.