Tuhot Ponoriukan
i. Hombo nontodon kinonuan ngaran do basaan koubasanan Sinulamba id
watas Kiulu?
ii. Nunu rati poinlisok tikid boogian id suang do basaan koubasanan Sinulamba id
aspek rika bontuk, motif, rinda om warana?
iii. Poingkuro laang mamagarung do basaan koubasanan Sinulamba mantad watas
Kiulu?
Pongintangan Literatur
Ponoriukan kokomoi basaan koubasanan mantad mogisuusuai etnik nopo nga’
ogumu no nowonsoi do mononoriuk di pogulu. Kogumuan nopo do ponoriukan diti
nga’ haro pionitan do ponoriukan diti. Poomitanan do ponoriukan nopo nga’
ponoriukan kokomoi Reka Bentuk dan Hiasan Linangkit pada Pakaian Tradisional
Dusun Lotud di Tuaran di sinoriuk di Humin Jusilin om Salbiah binti Kindoyop (2016).
Ponoriukan diti nopo nga’ kokomoi do basaan koubasanan tinaru Suang Lotud id
watas Tuaran. Suai ko iri, haro nogi ponoriukan di Salbiah Kindoyop, Humin Jusilin
om Noria ak Tugang (2017), di kiuhu do Pembudayaan Reka Bentuk Busana
Tradisional Masyarakat Dusun Tindal di Sabah di popotosol do koubasanan om rika
bontuk basaan koubasanan mogigion di kitinaru Dusun Tindal di poindoros do Nulu
Nabalu. Haro nogi ponoriukan mantad di Jenefer Masirin om Prinses Saliang (2018)
di kiuhu Sustaining Ethnic Identity Through Fashion. Ponoriukan diti nopo nga’
kokomoi do koponginwoguan do basaan koubasanan tinaru Kadazandusun maya do
kopointutunan do fesyen moden. Id kotohurionon nopo nga’ ponoriukan di Victor B.
Pangayan, A.S Hardy B. Shafi om Low Kok On (2017) di kiuhu Meaning and
Symbols in The Decorative Motifs and Patterns of Sinudot and Lapoi of The
Kimaragang’s Costume. Ponoriukan diti nopo nga’ kokomoi pionitan do koinusan om
basaan koubasanan Dusun Kimaragang.
Metologi Ponoriukan
Rika bontuk ponoriukan diti nopo nga’ etnografi, hinombo do kopionit o ponoriukan
diti do koubasan doid suang do isoiso tinaru. Tumanud Kementerian Pelajaran
Malaysia (2018), ponoriukan etnografi nopo nga’ iso’ kawo rika bontuk ponoriukan
montok monoriuk kowoowoyoo’ om koubasanan do isoiso tinaru pointantu.