Ponoriukan etnografi di ponoindalan diti nopo nga’ momoguno data kualitatif i aanu
mantad pogintangan, ponorubungan om ponoriukan kopustakaan.
Instrumen Ponoriukan
Haro tolu kaida ponoriukan di ginuno do mononoriuk id suang do ponoriukan diti.
Kaida-kaida dii nopo nga’ kaampai no do ponorubungan, pogintangan, om soriuk
kopustakaan.
Mamampayat Ponoriukan
Haro apat tulun mamampayat di pinili montok ponoriukan diti. Tumanud Kamarul
Azmi Jasmi (2012), mamampayat di pilion do mononoriuk nopo nga’ nuru do
kikabalan di takawas om kibagas kumaa ahal di uhoton do mononoriuk moi do’
kaanu o mononoriuk do data di ihumon. Mantad dii, mamampayat di pinili’ do
mononoriuk nopo nga’ mamampayat di kikabalan di takawas om kibagas kumaa do
basaan koubasanan Sinulamba mantad watas Kiulu. Mamampayat di pinili’ nopo
nga’ duo tulun mononombir mantad watas Kiulu om nogi duo tulun Unduk Ngadau di
nokoumbal do mamagarung basaan diti id suang do piboi’an Unduk Ngadau.
Prosedur Koponimungan Data
Prosedur koponimungan data nopo nga’ iso’ kawo laang di napalan montok maganu
do isoiso data montok do isoiso ponoriukan (Mohd Uzi Dollah, 2015). Kiwaa o tolu
prosedur koponimungan data pointantu di ginuno do mononoriuk maamaso do
monoriuk kokomoi basaan koubasanan Sinulamba mantad watas Kiulu. Prosedur-
prosedur diti nopo nga mogisuusuai tumanud do kaida pointantu di pinili do
mononoriuk.
Asil Ponoriukan
Mantad ponoriukan di pinoindalan do mononoriuk, nakaanu o mononoriuk do asil di
koponimbar do tuhot soriuk. Okito o asil ponoriukan id siriba tumanud tuhot soriuk do
ponoriukan diti: