id suang do toka-toki om fungsi toka-toki id koposion momogun Kuantan
Singingi. Asil ponoriukan popokito do aiso rontob toun, taang sosial om
pondidikan pointantu do sosongulun i kohompit id pomoinan toka-toki. Aiso
timpu poimbida kopoindalanan ababayan toka-toki nga koubasanan nopo
poindalanon maso mamain o tangaanak, kalapas mangaji' toi ko' modop id
surau, poposidang parai om monginggutu. Sumusuhut, boros ponguhatan
nopo di gunoon id suang toka-toki nga miagal do siapo toi ko' sapo (isai) om
apo (nunu) miampai variasi apo ru, apo lo ru, apo tu, apo jie kilen. Suai ko
momoguno boros ponguhatan, haro nogi kopomogunoon boros literal (harfiah)
om boros poinlisok (kiasan) id suang toka-toki Kuantan Singingi. Kifungsi o
toka-toki Kuantan Singingi montok papatarom pomumusorou sosongulun,
manahak ponontudukan om pondidikan, kohiakan om mongimbayat tulun
suai.
2.4 FOKUS PONORIUKAN
Fokus ponoriukan nopo nga kokomoi sundait id Kampung Lokos montok
mongilo, mamarati om momorekod do koulalaho om nogi roromu sundait di
gunoon komolohingan maso mongomot id Kampung Lokos. Sumusuhut,
mongilo nogi ponoriukan diti do fungsi sosial sundait toi ko’ tudu ababayan
mogisusundait maso mongomot o komolohingan id Kampung Lokos. Montok
aspek kounalan sundait sabaagi kolumison Boros Kadazandusun, ahal nopo
di maan potosolo nga kopomogunoon boros sastera, woyo kolinuudan,
kabaalan momusorou taang takawas, kiwaa rati di au potilombus om aplikasi
kolumison boros do sundait doid pongia'an id sikul. Oponsol o ahal-ahal di
nokomoi tu pogulu do popoia’ lilihis kaampai no sundait, minog do oilaan o
aspek koulalaho om fungsi do hiis dii.