Sundait id pondidikan nga kaanu nogi popoingkawas imaginasi om
mongumbal do kabaalan momusorou taang takawas do tangaanak. Maya
DSKP BKD Toun 2, poinhanggum o kabaalan momusorou di okritis, kreatif om
kaanu popokito pomogunoon do strategi id proses momusorou. Kaanu o
aktiviti sundait id suang pongia'an om pinsingilaan do papasarabak woyo
pomusarahan di akawas tu nuru tangaanak do monindu sisimbar montok
toisoiso sundait dii. Poomitanan nopo nga maya aktiviti tangaanak do monindu
sundait om popisudong miampai gambar di kotunud id suang Buuk Teks BKD
Toun 2. Poomitanan sundait id suang aktiviti dii nopo nga ''kirasuk nogi tanak
po, maha osukod pobulagoi'' miampai sisimbar nopo dau nga tuhau. Kaanu o
sundait dii popoingkawas pomumusorou tangaanak tu nuru yolo popionit,
momuhondom kawagu om momorindak kokomoi nunu okito maya pomogunan
om posorili i minonit do objek di kirasuk di tanak po om pobulagoi do osukod
tu misulak do fitrah koposion tulun o sundait dii tu poimbulagoi nogi di
buragang om kirasuk nogi soira agayo tu kopuriman di oikuman.
Kouludan boros di olinuud om haro rati di poinlisok i gunoon id suang
sundait nga kaanu nogi popoimbulai rahi sosongulun do minsingilo suai ko
popoungkalad woyo toluud id koposion diolo. Kopolombusan om pomoinan
sundait id suang koginumuan do tangaanak soira miuhot om misimbar nopo
nga iso ralan manahak ponontudukan kumaa diolo kokomoi kolinuudan om
kowowoyoo di osonong (Harun Mat Piah 1989: 361 id ponoriukan Fadzilah
Abdul Rahim & Shaiful Bahri Md. Radzi, 2021). Sabaagi poomitanan, maya
Buuk Nomungan Sundait Kadazundusun sinuat di Ree John Daulip (2014),
sundait ''sonlopot no takano om kowiyau do pomogunan'' (sisimbar: tadau)
manahak do kointalangan do i nopo tadau nga irad no sonlopot o takano soira
okito mantad pomogunan nga binabang nopo dau nga kaanu mamabang do
sompomogunan. Ingkaa nogi o koposion do tulun tu koimaan tosonong di
okoro nga kaanu manahak bagas kumaa tulun suai.
4.3. 4 POOMITANAN SUNDAIT MIAMPAI SISIMBAR
Kouludan id siriba popokito piipiro poomitanan sundait miampai sisimbar
tumanud nuludan tema om bontuk i naanu mantad toinsanan informan.