5.4.2 BAGAS KUMAA KINOYONON PONORIUKAN
Montok do kinoyonon ponoriukan, kapanahak o ponoriukan diti koilangan
kokomoi sundait komolohingan om ababayan mogisusundait id Kampung
Lokos tu au i abaal ngaawi o mogigion id Kampung Lokos kokomoi sundait.
Dadi, kapanahak o ponoriukan diti do kopointutunan kumaa diolo kokomoi
ababayan mogisusundait sabaagi koubasanan sandad id Kampung Lokos
mantad di laid po. Haro nogi piipiro poomitanan sundait i narangahan mantad
komolohingan i milo do sukuon om potungkuson kumaa sukod wagu tu ii no o
kointutunan do lilihis tinungkusan id kinoyonon sondii. Osiliu ponoriukan diti
sabaagi sukuon kumaa tulun ginumuan id kampung Lokos i au kopio kitoilaan
kokomoi do sundait sandad kampung diolo.
5.4.3 BAGAS KUMAA PONDIDIKAN
Nakaanu o ponoriukan diti momoruhang do toud koilaan kokomoi kawo hiis
tinaru Kadazandusun i nointutunan sabaagi do sundait. Nokopokito nogi
ponoriukan diti do elemen kolumison boros sundait di milo maan aplikasi doid
pongia'an om pinsingilaan id sikul. Suai ko ii, aplikasi sundait id pondidikan
nogi nga kaanu popoingkawas kabaalan momusorou om popoungkalad woyo
toluud do tangaanak om oinsanan mokiikinobos.
5.4.4 BAGAS KUMAA TINARU KADAZANDUSUN
Ponuatan kokomoi sundait diti milo silihon sabaagi kakamot sukuon montok
pinsingilaan om ponginralaman toilaan id timpu dumontol tu okuri po ponuatan
id suang Boros Kadazandusun loolobi kokomoi do tinungkusan, sastera om
koubasanan gulu-gulu moi do kopotindohoi om kopotilombus koburuon
koubasanan sandad tinaru Kadazandusun.
5.4.5 BAGAS KUMAA TULUN GINUMUAN
Popointalang o ponoriukan diti do kogingohon boros om koubasanan sabaagi
kointutunan do tinaru Kadazandusun tu timpu nopo baino nga au no okito
kopio kopomogunoon do boros om koubasanan diti gama koundolihon timpu
om koburuon teknologi. Papasarabak nogi ii do woyo toluud montok tumimba
koposion misompuru id taang kabansaan Malaysia Madani.