"My trowth ys plyght to yonne Skottysh knyght,
It nedes me not to tayne,
That I schulde byde hym upon thys bent,
And I have hys trowth agayne:
"And if that I wende off thys grownde
For soth unfoughten awaye,
He wolde me call but a kowarde knight
In hys londe another daye.
"Yet had I lever to be rynde and rente,
By Mary that mykel maye;
Then ever my manhod schulde be reprovyd
Wyth a Skotte another daye.
"Wherfore schote, archars, for my sake,
And let scharpe arowes flee:
Mynstrells, playe up for your waryson,
And well quyt it schall be.
"Every man thynke on hys trewe love,
And marke hym to the Trenite:
For to God I make myne avowe
Thys day wyll I not fle."
The blodye Harte in the Dowglas armes,
Hys standerde stode on hye;
That every man myght full well knowe:
By syde stode Starres thre:
The whyte Lyon on the Ynglysh parte,
Forsoth as I yow sayne;
The Lucetts and the Cressawnts both:
The Skotts faught them agayne.[25]]
Uppon sent Andrewe lowde cane they crye,
And thrysse they schowte on hyght,
And syne marked them one owr Ynglysshe men,
As I have tolde yow ryght.
Sent George the bryght owr ladyes knyght,
To name they[26] were full fayne,
Owr Ynglysshe men they cryde on hyght,
And thrysse the schowtte agayne.
Wyth that scharpe arowes bygan to flee,
I tell yow in sertayne;
Men of armes byganne to joyne;
Many a dowghty man was ther slayne.
The Percy and the Dowglas mette,
That ether of other was fayne;
They schapped together, whyll that the swette,
With swords of fyne Collayne;