rahung diti nga’ mantad teori pambalajalan sosial Albert Bandura hinonggo do
koonuan di tangaanak toi ko’ sukod wagu do toilaan nopo nga’ maya no do nunu i
nokito om norongou mantad posorili miagal do soira mogibooboros yolo miampai
tambalut toi ko’ tulun ginumuan.
Rahung nopo molohing momoguno boros suai ko’ Boros Kadazandusun di
kumoduo nga’ kohompit no ngawi turugan timpu kopogowit koundolihon boros tina’
kumaa boros kumoduo tangaanak id Kampung Minonun. Rahung diti nosokodung do
ponoriukan di Noor Aina Dani & Syeril Patrisia Kining (2016), hinonggo haro rahung
mantad turugan timpu di kaanu mamarahung koonuan boros tina’ kumaa boros
koduo di tangaanak. Teori nopo di monokodung do rahung diti nga’ mantad teori
koundolihon boros tumanud Chaer (2009) tu’ nunu nopo boros di norongou diolo id
posorili nga’ iri no boros di gunoon diolo.
Rahung nopo molohing momoguno boros suai ko’ Boros Kadazandusun di
kotolu nga’ maya no do pisasawaan di mirolot kopogowit pomogunoon Boros Malayu
toi ko Boros Cina di molohing kumaa tangaanak moi do lobi karati i tangaanak do
barasan. Rahung diti nosokodung id ponoriukan di Nevashiny Karuppiah om
Rosazman Hussin (2021), hinonggo koubasanan nopo nga’ momoguno yolo do
boros di osinang do rotion miagal ko’ boros koubasanan diolo id suang paganakan ii
nopo nga’ Boros Cina. Dadi rahung nopo do koonuon boros nga’ mantad no do
pisasawaan molohing di mirolot. Teori nopo di monokodung do rahung diti nga’ teori
Interaksionalis Mark Halliday hinonggo koonuan tangaanak do minsingilo do isoiso
boros maya do sokodung mantad tulun posorili miagal ko’ molohing diolo.
Rahung nopo molohing momoguno boros suai ko’ Boros kadazandusun di
kaapat nga’ molohing di aiso goos do papasarabak boros kadazandusun kumaa
tangaanak diolo. Maya nopo jadual nga’ rahung nopo diti nga’ okuri nopili do tulun id
Kampung Minonun. Mantad dii, goos nopo molohing id suang do papasarabak Boros
Kadazandusun kumaa tangaanak nga’ amu mamarahung pomogunoon boros suai
ko’ Boros Kadazandusun id taatanga komolohingan Kampung Minonun.
Rahung nopo molohing momoguno boros suai ko’ Boros Kadazandusun di
kolimo nga’ tangaanak di aiso sunduan do mintingubas do mimboros momoguno
Boros Kadazandusun id pilumaagan tikid tadau. Rahung diti nosokodung mantad
ponoriukan di Norazmie Mohd Yusof (2019), hinonggo Boros Malayu diti nga’ kaanu
mamarahung koonuan Boros Kadazandusun di tangaanak tu’ okito nopo nga’
kogumuan tangaanak lobi momoguno boros suai miagal ko’ Boros Malayu tu’
asanangan yolo momoguno do boros dii. Dadi aiso dii o sunduan diolo do