Kopointutunan
Boros nopo nga iso’ roromu i oponsol kopio do oilaan toinsanan tulun tu maya do
boros kaanu tokou miromut miampai tulun ginumuan. Oguno o boros diti soira do
milumaag miampai tulun toi ko’ oilaan nogi sabaagi pibarasan. Pibarasan nopo diti
nga popohompit do proses kopomolombusan do boros momoguno kakamot
artikulasi. Suai ko’ ii, aanu nogi o boros diti maya do pinsingilaan mantad di okoro po
om maya nunu i orongou mantad do posorili. Boros Kadazandusun nopo nga iso’
kawo boros tina mantad do tinaru Kadazan om Dusun. Naanu o boros diti mantad
komolohingan tokou di pogulu po om pinotungkus kumaa sukod suai gisom no do
baino.
Kointalangan Kobolingkaangan
Tumanud do ponoriukan di Tay Meng Guat (2006), apagon o manahak do komi
kokomoi diti koonuan boros do tulun tu ogumu o kaakaka mantad mononoriuk suai
kokomoi do poingkuro o tulun nakaanu diti boros i gunoon diolo. Boros koiso’ nopo
nga boros ii aanu mantad posorili toi ko’ boros di pogulu kopio norongou do
tangaanak om boros koiso’ nopo diti nga oilaan nogi sabaagi boros tina ii no tu boros
di pinasandad mantad tulun di pogulu po. Mulong do ingkaa, babaino nopo dii, i nopo
sukod wagu nga misuai o boros tina om boros koiso’ diolo loolobi po iti tinaru
Kadazan om Dusun. Ahal diti minanahak do topurimanan om osuayan do nokuro tu
okon ko’ boros Kadazandusun o boros koiso’ do sukod wagu id Kampung Lobong-
Lobong sundung pia do tinaru Kadazan Dusun om moboros do boros Kadazandusun
o molohing diolo.
Tumanud di Hendryson Dumat (2020), boros pilumaagan do sukod wagu
Kadazan om Dusun timpu baino nga lobi momoguno do boros Melayu Sabah. Ahal
diti popokito do boros tina do tinaru Kadazan om Dusun maid-laid nga tumagak nodi
sabaagi boros kumoiso’ kumaa sukod wagu. Atalang tomod iti id sikul tosiriba om
sikul takawas suai ko’ id gana ponginabasan lobi akawas miagal do Institut
Pendidikan Guru om universiti ii kiharo o tulun Kadazan om Dusun. Soira do
mogibooboros yolo nga momoguno yolo boros suai miagal do boros Melayu Sabah
om okon ko’ boros Kadazandusun.