Kopointutunan
Kampung Tomis Mangi Pangi nopo nga’ iso’ kinoyonon boyungan tulun Dusun
Bundu ii poinsuang id watas Tamparuli. Id konteks ponoriukan diti, naanu o ahal
karait pisasawaan id kampung diti sabaagi impohon ponoriukan ii pioniton do adat
sogit Kadazan Dusun. Adat sogit pisasawaan nopo di kakal po do padalanon id
kampung diti nga’ kopohompit no do pisasawaan di kipionitan piobpinayan.
Sundung po tu’ timpu babaino diti kokito tokou ogumu nodii tulun mantad
boyungan suai ii popomilo, monorimo om kaakun do pisasawaan di kipionitan
piobpinayan, tulun Dusun Bundu id Kampung Tomis Mangi Pangi nopo nga’
kakal poingigit kotumbayaan do au kawasa powonsoyon ahal dilo tu’ kaanu
mogowit ahal di au osonong kumaa kampung. Ii no pogi soira orikot timpu
monusui (pohoroon pogulu po do ababayan momuhaboi), nung oilaan do kiwaa
pionitan piobpinayan do tulun di miuhang-uhang dii, pokionuon iyolo do manahak
sogit nung sumonsog do miongoi (mikawin). Otumbayaan mogigiyon kampung
do kapanahakan sogit nopo nga’ okon ko’ kikorotian momorutum di misasawo
nga’ sabaagi panakatanda mamantang do mogigiyon kampung di suai.
Kointalangan Kobolingkaangan
Timpu babaino diti popokito kinomogoton koposion tongotulun i nokoburu
tuminanud kinoburuon timpu. Mantad no dilo, ogumu dii roromu koposion ii
noolingan tu’ kipomusarahan o sukod wagu do ahal miagal ko’ kaadato nopo
nga’ au nodii relevan id koposion tadau baino (Dayu Sansalu, 2008). Id suang
konteks ponoriukan diti, kiwaa ogumu sukod wagu boyungan Dusun Bundu ii au
nodii koilo kokomoi kaadato’ om sogit pisasawaan kipionitan piobpinayan,
kaampai no nogi koomulakan id Kampung Tomis Mangi Pangi sondii. Soira do
ingkaa, kopogowit dii iti do kapamansayan woyo di au kotunud id aspek kooturan
kampung loolobi no kopio id suang ahal piginawaan om pisasawaan.
Aiso goos mantad komolohingan montok popotungkus kooturan sandad om
aiso kakamot kopongilangan toilaan kokomoi kaadato’ om sogit pisasawaan
kipionitan piobpinayan nokopogowit nogi do kobolingkaangan diti.Tudu Om Tuhot Soriuk
Tudu Soriuk
- Mongintutun sogit pisasawaan tulun Dusun Bundu id Kampung Tomis Mangi
Pangi Tamparuli, Sabah. - Mongilo kopoindalanan ababayan monogit montok pisasawaan kipionitan