Pogibaabarasan Om Pomolingkuman
Maya ponoriukan di pinoindalan, noilaan do kiwaa duo kawo sogit manatak tiwanon
tinaru Dusun id Kampung Tibabar Kiulu Tamparuli, Sabah. Sogit nopo dii nga’
pisasawaan di kipionitan do raha’ om pisasawaan di miniompinai maya pisasawaan.
Sogit nopo diti nga’ koindalan soira haro pisasawaan di osomok o piompinayan. Ahal
diti sinokodung do ponoriukan nongkopogulu di sinoriuk di Soerjono Soekanto (1992)
kokomoi do sistem Eleutherogami ii au papasaga’ do pisasawaan di osomok o
piompinayan (Soerjono Soekanto, 1992). Sokiro potilombuson kasari o pisasawaan
dii nga’ oonong no do sogit pitas om kohompit no ngawi o sogit manatak tiwanon tu
pisasawaan nopo dii nga’ kiwaa pinsamakan do piompinayan toi ko’ kiwaa pionitan
do raha’ (Rita Lasimbang, 2013).
Sumusuhut, nokito nogi pisuayan do ponoriukan di nongkopogulu kumaa asil
ponoriukan dii naanu kokomoi do kopoindalanan sogit manatak tiwanon. kogumuan
ponoriukan di nongkopogulu karait kokomoi do taang-taang manansawo miagal
ponoriukan di Rita Lasimbang (2018) kokomoi do Adat Resam dan Pantang Larang
Suku Kadazan di Penampang, Sabah, ponoriukan di Rita Lasimbang (2013) id suang
Dewan Bahasa dan Pustaka Kuala Lumpur (2013) id nombo noboros do kiwaa tolu
taang manansawo di poingimpou do tinaru Kadazan id Penampang om taang nopo
di nga’ monohuku, momuaboi om matod. Mantad dii, noilaan do ponoriukan nopo diti
nga’ poinsuusuai om poinwaawagu mantad ko’ ponoriukan di nongkopogulu.
Suul
Daamot kopoindalanan do ponoriukan diti, nakatayad nogi piipiro suul i aanu do
poindalanon montok mononoriuk om ponoriukan di sumusuhut kokomoi do sogit
manatak tiwanon diti montok ponginsanangan om ponginlaaban do ponoriukan diti.
Suul nopo dii nga’ ponoriukan sumusuhut montok diti sogit manatak tiwanon id
kampung om watas di suai, ponoriukan kokomoi kinoimbulayon diti sogit manatak
tiwanon, ponoriukan kokomoi ra’an-ra’an diti sogit pitas di kisogit manatak tiwanon
om kumotohuri, suul kokomoi do kawagaton do sogit di minog do bayaran tumanud
do pinsamakan om nogi sinakagon di miniongoi.