Sompuruan Artikol Jurnal Ponoriukan PISMP Koonuan Mahas 2018 (BKD, SK)

vi

Assalamualaikum wbt, Kopisanangan

Kounsikahan miampai au ogina kumaa Minamangun tu minanahak do kagarasan om lisi montok doho
om koinsanai lungkitas Boros Kadazandusun, IPGK Kent montok minanapanai koinsanai 18 tulun
mokiikinobos PISMP Boros Kadazandusun daamot pinopoindalan do ponoriukan gisom nokopongo iso’
sompuruan artikol jurnal ponoriukan montok toun 2022.

Maya ponoriukan di pinoindalan do mokiikinobos ontok kowion no do ponginabasan diolo,
nolodi’ om nakaanu iyolo do koinganan sabaagi songulun i kiula do mononoriuk montok poposolimbou
songulun individu di kitoilaan om kikabaalan monolibamban do kobolingkaangan di otoguang id gana’
pondidikan. Maya nogi do ponoriukan, kasarabak nogi o ula koubasanan di momonsol katapatan id
ponoriukan. Otumbayaan oku do koinsanai nopo 18 tulun mokiikinobos boros Kadazandusun diti nga’
gumino’os om minomonsoi ponoriukan diolo tumanud prosedur di kotunud.

Sumusuhut, oponsol do polobuson om poilangon o sompuruan artikol jurnal ponoriukan diti
montok mongingggumu om momoruhang do kakamot om susukuon do mokiikinobos, lungkitas,
mongingia’ om tangaanak sikul mooi do koburu om kotungkus iti boros tina’ tinaru Kadazan Dusun.
Suai ko mantad dii, koilo om kotutunan nogi daa do o tinaru suai di aanangan do minsingilo’ kokomoi
do koubasanan tinaru Kadazan Dusun maya do kolobuson do sompuruan artikol jurnal ponoriukan diti.

Lansan ku mooi daa do toririmo o mokiikinobos boros Kadazandusun Koonuan Mahas 2018
diti do popoindalan ponoriukan sundung pia do kalabus om kosiliu no do mongingia’ tohuri tadau
montok papalaab toilaan id gana’ pondidikan om montok monolibamban kobolingkaangan id sikul.
Kolimpupuson, mongunsikou oku kumaa toinsanan puru i minonguhup papalabus do artikol diti loolobi
no kumaa Dr. Hajah Rosmawati Binti Hamzah B.S.K, Luguan IPG Kampus Kent, Datin Dr Hajah Rosinah
Binti Edinin, Timbalan Pengarah IPG Kampus Kent, Dr. Saimin Ginsari, Ketua Jabatan Perancangan,
Penyelidikan dan Inovasi koinsanai panel editor om individu di nokouhup miampai potilombus toi au
montok momongo do artikol jurnal diti.

Pounsikou,

LINAH BAGU @ SITI NURLINA ABDULLAH

PRAKATA

KETUA JABATAN BAHASA KADAZANDUSUN

Institut Pendidikan Guru Kampus Kent.